'A TAZZA 'E CAFE'

Quant' è calma stà nuttata ì settembre ...   Che silenzio attuorno; che freschezza chest'aria pulita .
E comm' è doce a chiagnere cù stu desiderio ì te dint'ò core.
Io me vòto e me giro, dint'a stu lietto senza pace. Me vòto e me giro, e m'arricordo...
Che mumenti, cù, te, Ammore mio !
Mumenti grandi, pè me. Belli e appassiunati. Mumenti, cà io sola vivevo; sola io vulevo... e cà io sola suffrevo. Tu ce stive, si ! Ma nun vulive a me. Io amavo sulamente a te.
Dicesti : -- "  Nun è cosa ! Lassamm' stà, ch'è meglio. " --
E io ? Che me ne faccio io , mò ,  ì sti 'mmane cà nun te ponno accarezzà 'cchiù; ì st' uocchie miei, se nun se ponno  'cchiù affunnà dint' o pozzo scuro ì chilli tuoi ?
Spiegame a che me serve, ormai, stu core, cà senza te è fernuto.
Dimmello tu comm' à  posso arretruvà a pace mia : te  ll 'è purtata via cù te !
Luntano canta n'aucielluzzo, tiennero, piccerillo e sulo; comm' a me.
Cù ll'uocchie apierti; spalancati d'int'ò niro ì chesta notte senza fine; io, zitta, zitta m' ò cullo stù dulore dint' o core, amorosamente, comme fosse nà Criatura mia.
E me mozzeco o musso pè nun o scetà, mentre te chiammo disperatamente.
Ma tu addò staje, Ammore mio carnale ? Me pienze, comm'io penzo a te; me siente dint' o  core, comm'io sento a te ?     PECCHE' ?
Ma  Pecchè nun m'arrespunne ?
Cchiù debole chiagne luntano l'aucielluzzo, e intanto o suonno vène ...
E dint' o suonno vieni tu.
E me dici cà sò 'bbella; m'asciutte stì lacreme; e me vase a fronte cà m'abbrucia ...
M'accarezze i capille, e pò  m'astrigne forte, forte 'mpietto a te.
Sulo accussì, vicin' o sciato tuoio; trovo pace; e cuntenta m'addormo, 'ncoppa a stà " nonna-nonna" antica cà dice : -- Sì tutta a vita mia... te voglio bene assaie --
... E finalmente m'arrepòso; dint' a pace ì stà nuttata settembrina, cà ormai, chiano, chiano... Doce, doce... se ne và a murì.

Si ringrazia l'autore damainrosso per la gentile concessione

SE VUOI ASCOLTARE LA MUSICA CLIKKA QUI