storia pavese

Lo sport oggi

Sport jer e incö

Quand seram fiö giugavam in s’la strà,

quaši sempar adritüra in pé partèra,

con una bala da stras tüta ligà

e cui Caplon in continua guèra:

giügà in s’la strà alur l’er pruebì,

ma nüm ad post gavivam dumà qual lì.

Giügavam al Gir d’Italia cui balèt,

curivam in si strà cul sérc, a pé,

nudavam in dal navili, ch’l’era nèt,

giügavam a la “lipa”,  avanti e indré.

Jeran bèi temp, gavivam mia ad penser,

è pasà apena setant’an… par jer.

Adès i giögan al calcètto a sèt

in camp afità a un tant a l’ura,

tüt intapà, cun maja e cun scarpèt;

par fin un altar mond, altar che alura:

‘s vèda in si strà amanti dal pedal

cun biciclèt chi cust’n un capital.

Anca se   cèrti sport jen  un afari,

cun sponsor e reclam par tegni in pé,

e certi imbroj jen no tanta rari,

deva vinc l’unestà,  e no i danè;

al sport p’r i nostar fiö ‘l deva restà

‘na vera scola ‘d vita e  ‘d lealtà.

La Pavia a gh'è pü

La Pavia a’ gh’è pü

Una volta scrivivi in alegria

i belès ad la “Pavia e pö pü”,

adès scrivi con tanta nustalgia

i disgrasi ad la “Pavia ‘a gh’è pü.”

L’è una cità sensa fantašia,

gh’è pü par Pavia la festusità

ca purtava pri stra la Goliardia

di student ad l’università.

Gh’è pü la Pavia industrial,

quand ‘s vediva  migliaia ‘d biciclèt

snudas tüti in fila longh i vial

la matina, in corteo dopü i sèt.

Gh’è pü la Nechi, la Viscosa, l’Arsenal,

la Neca, la Moncalvi, Vigurèl,

tüta l’indüstria adès l’è finì mal,

un po’ par volta l’è stat un macèl.

Jeran la gran richesa ‘d la cità,

lauravan tüti cun sudisfasion,

purtavan redit e serenità;

adès è andat tüt cos a monfurlon.

L’idroscalo l’era un vanto pri paveš

l’era l’apòg ad bianch idruvulant

che i purtavan triestin e turineš

in sal nostar cél, türista e cumerciant.

ma a causa ad l’incüria di paveš

ades l’è trasfurmà in una ratèra!”

Andà al cine l’era ‘na sudisfasion,

bastava fa dü pas in curs Caur,

par vèd tüta la prugramasion,

Western, cumedi o film d’autur.

Adès ad cine agh né pü mia,

pian pian jen tüti scapà,

par vèd un film in cumpagnia

bsogna par forsa andà föra ‘d cità.

Quanti ricord, quanta nostalgia,

quanti vision richiama la memoria!

Ma l’era bèla alur la mè Pavia,

cul so Canal e  tüta la so storia.

Una volta scrivivi in alegria

i belès ad la “Pavia e pö pü”,

adès scrivi con tanta nustalgia

i disgrasi ad la “Pavia ‘a gh’è pü.”

Chisà parchè

Esprimo una serie di preoccupazioni dell'uomo della strada sul momento sociale che stiamo vivendo.

Chisà parchè 

Chisà parchè quand ma vegli la matina
sum seren, tranquil, fina utimista,
pö legi al giurnal, la solita manfrina:
ladar, imbruion, 'na longa lista.
   Sarà parchè par lur l'è la nurmalità,
   quasi sempar sicür 'd l'impünità.

Chisà parchè  gh'è in gir di  delinquent
che i culpisan i person anšian
che con i püsè  svarià  travestiment
a gh'portan via tüt cos, sti maraman.
   Sarà parchè malgrado 'd certi lég,
   gh'è propi pü mia  'd  rispèt pri vég.

Chisà parchè se al fisco l'è a bulèta
al va tö i danè d'la pora gent,
che pö jen quai ca tira la carèta,
quai che gn'han tanti i tiran föra gnent.
   Sarà parchè ad danè 'na gira  pü
   e i fabrich e i negoši i saran sü.

Chisà parchè par truà un laur
bisogna vègh un sant in paradiš,
un pulitich, interesa no al culur,
o vün impurtant ca 'l ta sia amiš.
   Sarà parchè adès var no l'abilità,
   ma serva dumà da vès racumandà.

Chisà parchè crèsa i dišocupà
che par la magiur part jen uperari,
e in dal fratemp è aumentà
la vendita di SUV e di Ferrari.
   Sarà parchè adès am fan pensà
   che la distribušion di sold a l'è sbaglià.

Chisà parchè migliaia 'd deputà,
jen bon dumà da litigà fra lur,
oltre a prumèt quand ghè da andà a vutà,
qualsiasi roba,  si, certo, andà a discur!
   Sarà parchè guvernà l'è 'na roba seria,
   j altar jen tüt  bal früst, porca mišeria !!

L'ultim dì da scola

La scuola è un momento determinante nella vita, si dice che "Gli esami non finiscono mai".

Séš an, che bèl mumént, che emusiòn!
Cumincia la scola, luntàn  dai familiàr,
cumincia la vita,  la vita ad  relasiòn,
quèst l'è al prim di d'la scòla elementàr.
Ma j an i pasan prést, al temp al vòla,
e riva a la fin l'ültim di da scòla.

Salüdà i cumpagn e gl'insegnànt,
tanti aš vèdràn ummò l'altr'an, altar chisà,
la vita ja sparpàja,  o poch o tànt,
s'pö no  savè in dè ca ja purtarà.
Ognün al gh'ha 'l so destin ca 'la cuntròla.
Però che bèl, l'è l'ültim di da scòla.

E sarà insì, ogni  volta,  ind'la nosa vita:
la media,  al liceo, la maturità,
jen sempar ešam, 'na storia infinita,
par rivà a la  fin ad l'università.
At ciàman "dutur", che béla paròla:
però par ti l'è l'ültim di da scòla.

La  vita l'è un cuntinuo insegnamént,
cun la continua lesiòn ad l'esperienša
ch'la finisa cal dì, cal brüt mumént, 
ca 's cunclüda la nostra esistenša.
Cal dì  che tüt al nos mond al cròla:
anca par nüm l'è l'ültim di da scòla.

A la sera

Alla sera, il momento più bello della giornata, quando la famiglia è tutta riunita, nel racconto di tre ragazzini.

Tri fiulin a scola jen dre cüntasla sü,
i parlan 'd sal'è chi fan la séra
quand, dopu cena, ad compit as parla pü
e 'd la familia as viva l'atmusféra.
Natüralmént jen divèrs i sitüasiòn,
e a nüm i crean divèrs i riflesiòn.

Giorgio al gh'ha 'l papà cal fa 'l dentista,
e una familia cun mja  ad dificultà,
'n mama semp'r in tir, 'na dona in vista,
sta ad ca in centro, in un bèl fabricà.
"A la sera piam sü e tüt quàtar
 andùma al cine, di volt anca a teàtar."

Al Carletto l'è  'l fiulin d'un impiegà,
in cà l'è no che i rob i vagan mal,
però gh'è da sta tént a qual ch'as fà,
'nda föra gh'è da spénd un capital.
"In cà  mi gh'ho un gros televisùr
e pàsam i sér insèma ai genitùr."

Piero l'è 'l fiö d'un pòvar uperàri
ch'l'ha pèrs al post e che 'l sa no me fà
par tüti i dì a fà sbarcà 'l lünari.
a la familia , l'è pién 'd dificultà
"La sera stuma in cà , tüt sudisfàt:
mè papà scurèša ...e nüm ridàm me i màt".