occhiodivolpe

ma che ssaje ... addò te miette ,
'a puisìa manco 'a canusce :
nun sì manco allitterato
che vuò fà ? 'o jurichiere ?

isso Armando re'  Spinielle
porta nomme p' 'e puisìe ,
ci ha 'na bbella nummenata
e ha scritto pure 'e libbre ...

tre ll' ha fatte 'o Capefierro
'o tipògrafo a Tulèdo ,
ati dduje a Montesanto
chillo 'e faccia 'o bar Nunziante ,

e nun l ha fatto p' interesse ,
p' 'e pavà a pronta cassa
s' è vennùto 'ncoppa 'a Posta
'nu garage che teneva ...

mo stai zitto ? è un gran puèta
scrive pròpreto taliano
cu' pparole fini e scìvete
ca io e ttè poco capimmo ...

siente sié : ' in fronte tu
hai pallottole di ricordi
tra gli occhi a me sparato '
siente siè ..  e statte mo ...

e po' vìre comm' è bbello
ca nun fa 'e rrighe uguale ,
pare comme 'o zìgg zàgghe
ca una fuje annanze a n' ata ...