occhiodivolpe

...

- nun dà auriénza , agge paciénza -
ogni vvòta int' 'e ccervèlla
m' 'o rripèto mo è 'nu mese
che fà ammore essa cu' mmè :
che maròsca , stà già ccà
manco pozzo riciatà ;

fuie ll' autrière int' 'a traversa
che 'ncucciaie a Cuncettina :
comme 'a tengo 'a mano mmano
e lle dico ddoje parole
che maròsca , stà già ccà
manco pozzo riciatà ;

vìre tu int' 'a serata
stammo annanze alla tv :
io m' aìzo p' 'o gulìo
dint' 'o frìgo pe' mmagnà ?
che maròsca , stà già ccà
manco pozzo riciatà ;

tiène mente po' sunà ,
fà 'nu squillo 'o cellulare ,
ca nun aggio ditto - pronto ,
ma chi è , io sò Tanino - :
che maròsca , stà già ccà
manco pozzo riciatà ;

quacche vvòta int'a ffèsbùcc
sto guardanno 'e quacche amica 
p' 'a verè int' a 'na foto ?
'nu rummore arrèto 'e spalle :
che maròsca , stà già ccà
manco pozzo riciatà ;

che te crìre ? io mo ccà 'ncoppa
stongo a ffà chesta puisìa ?
pare a ttè che parlo r' essa
e fernesco primma 'e mo ?
che maròsca , stà già ccà
manco pozzo riciatà  ...