occhiodivolpe

'e spaghette

nossignore , erano spave ...
m' 'o cuntava zì Vicienzo
quann' 'e tiempe 'mmano a tata
luonghe luonghe comme 'o vrazzo ;

comme 'e spave s' 'e magnava
pure Orlando 'o palatino
e cu' tutte ll' ate assieme
s' 'e magnàvano accussì ...

dice po' ca ccà venette
don Lisandro 'o signurino
e a isso cu' licenza
lle faceva proprio schifo

r' 'e ttagglià sulo cu' 'e riente ,
se spurcà pe' tutto 'o musso ,
r' 'e ttaglià pe' ddinto 'o piatto
cu' 'o curtiello a ppoco a ppoco ...

accussì 'e ttagliaje primma ,
accussì 'e facette curte ,
e parlanno talìiàno
accussì 'e chiammaie spaghetti