occhiodivolpe

'a libbertà

Ce vulesse , pe' 'na vota
che dicisse - ma che vvuò ?
io cu' ttico ce spartimmo ,
pe mmé voglio 'a libbertà -

io a ttè te voglio bbene
ma penziere nun ne voglio ,
ma cher' è 'sta ggelusia ,
ca mme faje sempe 'ncuità ?

Pecché io po' vurria sapé
cu' cchi parle a 'o cellulare ,
sempe a ffa' 'sti messaggielle ,
tutto 'o juorno a resatelle .

Accussì a 'sta figlia 'e 'ntrocchia
'a vulesse addimmannà
si nun è 'na 'nfamità
chello ch' io aggia passà .

E pecché tutta scullata
'a cammisa llà è spuntata ,
e si chillo appizza ll' uocchie
sulo doppo 'a sta a accuncià .

E cher' è che 'o viernarì
s adda ì a magnà 'na pizza ,
mai cu' mme ma c' un amico
e che 'o mmale nun ce stà .

Io capisco 'a cunferenza ,
ll amicizzia signorsì ,
ma si chesta è 'a libbertà
lle cantasse 'sta canzone :

- Oi nè 'a via è libbera ,
tu fa' chello che vvuò ,
cu' mmé fai palla corta
zùcate 'a libbertà -