LF § The Great Eagle

Verum, sine mendacio certum et uerissimum, quod est inferius, est sicut quod est superius,

et quod est superius, est sicut quod est inferius:

ad perpetranda miracula rei unius. Et sicut omnes res fuerunt ab uno,

meditatione unius; sic omnes res natae fuerunt

ab hac una re, adaptatione.

Pater eius est sol, mater eius luna; portauit illud

uentus in uentre suo: nutrix eius terra est.

Pater omnis telesmi totius mundi est hic.Vis eius integra est.

Si uersa fuerit in terram, separabis terram ab igne,

subtile a spisso, suauiter cum magno ingenio.

Ascendit a terra in coelum, iterumque descendit in terram,

et recipit uim superiorum et inferiorum.

Sic habebis gloriam totius mundi. Ideo fugiat a te omnis obscuritas.

Hic est totius fortitudinis fortitudo fortis;

quia uincet omnem rem subtilem, omnemque solidam penetrabit.

Sic mundus creatus est. Hinc erunt adaptationes mirabiles,

quarum modus hic est. Itaque uocatus sum Hermes Trismegistus,

habens tres partes philosophiæ totius mundi. Completum est quod dixi de operatione solis.