L’amara storia ‘ Cicciu.
I
Cumincia ccà l’amara storia ‘i Cicciu,
chi si partìu di casa ‘na matina,
‘n cerca d’amuri, qusi pè capricciu:
e non sapìa c’ amuri è ‘na rapina
chi jetta cori ed anima a lu schicciu
di doluri, di morti e di rovina.
Divina Musa, tantu po’ ‘nu ricciu,
‘nu sguardu, ‘nu suspiru, ‘na mojina

di donna bella, o chi si cride tale!
Siccomu fa marvizza chi si ‘nfrasca
a testa sutta, si fami l’assale,
(spara lu cacciaturi, cogghje e ‘ntasca),
appena Cicciu vitte la figghjola,
‘ncamatu, mise u pedi ‘nt’a tagghjola.

L’amara storia ‘ Cicciu. – II –

Ma tu, divina Musa, dimmi, è veru
ca bella e ricca e di modi gentili
era la donna? O sulu lu pensieru
di Cicciu, lavurandu ‘n grande stili,
la rendìa tale? Sciogghj lu misteru!
O Musa, forsi è giustu, tu li fili
mai di la trama mustri per interu.
La donna ‘i Cicciu, certu, non è vili:

‘nc’è cu bella la giudica e avvenenti,
‘nc’è cu dice ca è stràbica e tartaglia,
cu dice : “è ricca” e cu: “ non have nenti”.
Pe’ Cicciu basta l’arti di la maglia.
Ccussì, a jennarju, cu viscati e riti,
catturanu li spinzia li Cianiti!

L’amara storia ‘i Cicciu – III –

‘Mviscatu comu ad ìlicu marvizza,
Cicciu non ha cchjù paci, né riparu.
Amuri, dubbiu, gelusia, allerghizza,
canti, risu, suspiri e chjantu amaru
lu tènenu ligatu a la capizza,
comu a lu mulattieri lu sumaru.
Milli vileni , pè na sula stizza
di speranza, si ‘mbive. – Oh, comu è caru

l’amuri di na donna cuntegnusa:
duve u terrenu è tènneru, cchjù a fundu
zzappa, e non cede, e trova sempe scusa
mu fa girare ‘ a giostra ‘n tundu ‘n tundu;
joca comu la gatta cu lu sùrici,
lu stona senza droga o barbiturici.

L’amara storia ‘i Cicciu – IV –
( Sonetto di Ciccio)
Donna dell’alma mia tormento e pena,
non vedi in quale inferno si dibatte
lo schiavo tuo, che Amore alla catena
tiene sì avvinto, e le maglie ribatte?
Come, donna crudel, ti senti aliena
da mie sembianze pallide e disfatte?
Travagliosa è mia vita; e quando piena
si stampa in ciel la Luna, e fuggon ratte

le Stelle, e quando l’Alba il novo giorno
mena ai mortali, e quando grande il Sole
dardeggia, e quando Vespro fa ritorno.
E’ sì grande il mio affanno, e sì mi duole,
che di me ho pietà, e d’altrui scorno,
che scorge in me il pallor de le viole.

L’amara storia ‘i Cicciu – V (Lu gabbu di la genti)-

“ Cummare mia, sapìstuvu ‘a notizia?
Dice ca Cicciaredhu è ‘nnamuratu
di na figghjola, chi cruci e delizia
ogni stanti ‘nci duna. Disperatu
passa la vita sua ‘nta la tristizia:
passija ‘i susu vasciu stralunatu,
pensandu sulu a la sua bella tizia:
fami non have o sonnu, ammajinatu!

Sapiti, l’atru jornu lu trovaru
chi sdunava, vicinu au cimiteru,
ciangièndu comu viti: ‘amuri amaru!’
Oh, focu mio, si u fattu è pe’ daveru,
mo nui di ccane lu perdimu a Cicciu:
‘nsuratu o mortu, è sempe nu pasticciu!”

L’amara storia ‘i Cicciu – V – Lu gabbu di la genti

“ Viditi la fortuna? ‘Nd’have au chjanu
figghj di mamma chi cercanu maritu!
‘Nc’era bisognu mu vace luntanu?
Quandu lu seppe fìgghjama, ca è zzitu,
‘nci catte lu ragamu di la manu,
perdìu la vuci ‘nsiemi au culuritu.
Vui sapiti ca fìgghjama, a Milanu,
rifiutau, pe’ Cicciu, nu partitu

chi non vi dicu. Ma la sorta gira
tutta cecata, e non guarda a bellizza;
non bada a dota, a curredu né a lira.
L’amuri novu u tira da capizza:
‘nci mise nu parocchj assai di vagghja,
e Cicciu cride all’erba, e inveci è pagghja!

L’amara storia ‘i Cicciu – VI- Cicciu smanija.

Amuri, tu mi fai pemmu sduniju
matina e sira, e sonnu non ‘nda sacciu.
Spissu, cercandu ‘a menti mu sbariju,
sulu, pe’ timpi e varranchi mi cacciu;
terri margi e zzappati ‘nda giuriju,
chi cu vide dice : “Poveracciu,
assai peccati fice, si castiju
tantu rande lu manda èrramu e pacciu!”

Càpita, ‘ncuna vota, mu mi sentu
talmente stancu e a lu sonnu vicinu,
chi chjudu l’occhj ‘ntantu chi caminu.
Ma basta pocu scrusciu, o nu lamentu,
e sùbitu ritorni tu, assassinu:
e tòrnanu doluri e sentimentu.

L’amara storia ì Cicciu –VII- Cicciu canta di sdegnu.

Tantu tamarra e tantu arcigna pare
la donna mia, si degna mu saluta,
chi acceca ‘i n’occhju cu’ la vo’ guardare
e ‘a lingua , pezza pezza , ‘n terra sputa.
Quandu idha passa , senti jastimare
l’ura e lu jornu di la sua venuta,
la nanna, lu pappù, la zzia , ‘a cummare,
cu’ ‘nc’eze latti a postu di cicuta.

Mandata a chistu mundu fu , pe’ certu,
mu fa ciangire duve risu abbunda,
mu fa di ‘na città mutu disertu,
d’ordini e paci, mu fa baraunda.
Di li sue labbra belli nasce ognura
fragellu, terremotu e jettatura!

L’amara storia ‘i Cicciu – VIII – Cicciu canta ancora di sdegnu.

Quandu nescisti tu, rosa di giugnu,
si ‘intìseru li scàsseri sgramari,
ogni tamarru avìa la faci ‘n pugnu,
lu cuccu avìa partutu ‘i Hjelandari;
cantavanu cu vuci di Modugnu
li ciucci ‘ncapizzati a l’olivari;
lu surbu talijava a lu cutugnu,
la turtura ciangìa tra l’azanari.

Pàtruta s’ammucciau sup’a timpiata,
màmmata inchjìa di larghimi ‘na gutti
e la mammina non voze pagata.
‘Ngrugnati eranu sori e frati, e tutti;
ma nànnata, ammussandu a la cannata,
disse: “Ehja, figghja, ‘ a fortuna è di’ brutti!”

L’amara storia ‘i Cicciu: IX:- Cicciu si ‘nsonna.

Arrocculatu ai piedi ‘i n’olivara,
pensusu di li guaj chi mi chjoviru,
fra testa e codhu, ‘nta sta vita amara,
l’occhj stanchi, a la fini, si chjiudiru.
‘N sonnu mi parve scùrrere hjumara
di ‘ntornu a mmìa, chi gridu e chi deliru;
petra non c’è, non ‘c’è ‘na gutamara
duve ‘u m’aggrappu. – Duve l ’occhj giru,

è lenza para d’acqua chi trascina.
Ed, eccu, tu arrivare, a piedi asciutti,
serena e bella tra tanta rovina:
ed io tèndere a ttìa , di tra li flutti,
li mani suppricanti; e tu sdegnare
puru mu guardi a mmìa, ed io annegare!