de Pietro GattolinMemoria euganeaQuando se ’ndava a botegaQuando se ’ndava a botega… ogni botega gheva el so nome.
Na volta le farmacie le jera senpre verte, ma de sicuro le jera assè poco frequentà.El becaro – Chée ciare volte che se ’ndava a conprare calcossa a jera na conbinassion, da Pascoa o da Nadale; la carne dal becaro la jera pa’ i siori, e par i poareti bastava passarghe davanti e vardare.El casoin – El vendéa de tuto, ma tuto siolto, de confessionà no ghe jera gnente da conprare: ojo, conserva, pasta, riso, fasòi, farina e anca formajo; insoma a jera tuto in vista e se conprava tuto a peso.El tabachin – Se ’ndava a conprare el sale, i fuminanti, i boli, el tabaco, tuta roba del monopolio; le sigarete de solito le conprava i siori; i poareti i conprava tabaco e cartine e anca makuba da naso.El frutarolo – Giusto de inverno, par conprare bagigi e stracaganasse e calche naransa, ma verdure se ’ndava a catàrsele par i canpi, e anca qua la jera roba par i siori.El fornaro – Anca qua se conprava solo farina jala e bianca; el pan, par la festa, ma in casa se faséa el schissoto e poenta calda brustolà; de ’e volte pan biscoto par fare supa, raramente.El munaro – Se ’ndava a masenare el formento e anca el formenton e se portava a casa la semola par le galine e anca par el porsèo.Dal semensaro – Se conprava somense da somenare, fasòi, megole de suca e anca piantine de versa e bròcoli, ma anca tràpole par ciapare le séleghe, on poco de tuto.Dal socolaro – Se conprava spaghi da scarpe, cordoni de curame e anca curame e senge, tirache, ec. Tuto el resto se conprava al marcà, come formajo da gratare, el ton e anca sardèe soto sale, par fare i bìgoli in salsa.Dal spessiale – Se ’ndava a conprare i purganti come la manesena, na spece de pólvare par tute le ocasion, el spirito, cossì el jera ciamà el alcolo, l’ojo de siropeto par purgare i putèi quando che i jera stitichi, e de i piramidoni par el male de testa. Le farmacie de sicuro le jera assè poco frequentà.La pescarìa – Na volta tanto se ’ndava a conprare le sardèe, par métarle in saore e anca el bacalà che na volta el costava poco; el jera el magnare de i poareti; adesso el xe deventà na prelibatessa; co quelo che ’l costa i ne ga tolto anca questo.I bàcari – On anbiente, che na volta se ciamava cossì, ’ndove se vendéa i sponcioni, frequentà da i fachini e i pescadori, ma anca da i murari e i pensionati; se podéa stare là anca sensa tore gnente e cussì i stava al caldo, ma anca questo el xe stà sarà, come squasi tute le hostarìe, ’ndove ’ndava i veci a contàrsea. Mah!Na volta, anca ghe jera soto i pòrteghi vari venditori de robe stranbe, come chi che rostiva maroni e patate mericane e anca megolare che le vendeva somense de suca, senpre arente na hostarìa e le ghe metéa tanto sale, cussì i ’ndava a bévare onbre e l’osto el ghe portava fora da bévare (i jera d’acordo) e el comercio el funsionava; ma soto i pòrteghi ghe jera anca altri comerci come chi che i vendéa botoni, àstico, aghi e cordèe; e tuti se rangiava.I galinari e i conpradori de polame e ovi – I se metéa in te ’e contrà che le portava al marcà, e la gente de canpagna i vendéa polame e ovi e cussì no i pagava el dassio.Ma el comercio el jera na maniera de rangiarse, come portare par le fameje el late; ogni latarola la gheva i so posti da portare el late, na usansa che la se perdeva in te i tenpi.Tuti sti botegari e sti modi de rangiarse i jera na maniera par la vera sopravivensa. E no xe miga tanto che no la xe più in giro. Tuto el jera on modo che noantri ’taliani a ghévino catà el modo de canpare; el jera deventà na usansa de rangiarse, che ’desso i lo ciama folklore, ma mi digo che la jera solo sopravivensa. [rivista quattrociacoe mese di settembre 2011]