di Ugo Suman La villa de ...
La villa de la contessa gaveva un giardin, anzi, un brolo, che a noialtri boce ne pareva el paradiso terestre par le tante piante da fruto che ghe gera. Co rivava la stajon dei fruti i più esperti tentava de andar dentro par robare: susini, amoli, brombe e sarese, ghe ne gera da butar via. Ma el can de guardia insieme al custode no perdeva de ocio le piente, difissile schivarli. Alora i boce dei campi gaveva par mestiere fisso l'andar parte dei altri a fruti. Un pecato che se confessava e che i preti, savendo de la fame che girava e de la gola dei putei i considerava na mancansa, sensa bisogno de penitensa.Anche parchè i fruti de la contessa, na parte vegneva magnà dai osei e n'altra parte cascava par tera marsi. La contessa rivava in paese solo qualche mese d'istà e par el so arivo, la villa gaveva tute le finestre spalancà e la corte lustra come un selese. La proprietà contava mezo mejaro de campi padovani compreso un bel toco de vale verso Ciosa, tuto diviso in boarie spampanà par la Pianura de la Bassa. La gaveva donà a la cesa parochiale, na campagnola in memoria dei genitori e, par questo, i ghe tegneva un posto riservà co l'inginochiatoio e na poltronsina rossa. Solo ne le domeniche che la gera in villa la andava a la messa granda e, sicome la gera ansiana, la stava sempre sentà fora che nel momento de la consacrassion quando i zagheti sonava el campanelo. Soto al portego de la villa faseva mostra na carossa a quatro rode co la capota che se alsava, la zente la ciamava un Landò. La contessa la usava col cocio el cavalo baio, solo poche volte l'ano: da la villa a la stassion. Par el resto del tempo i la coverzeva co un telo e i can ghe dormiva de sora. Dopo machinà el formento sul selese, che i omani diseva grande come na piassa d'armi, la faseva preparare par ma messa de ringrassiamento. Partecipava solo quei de la contrà e altri afituai o mezadri de le so tere e de so boarìe. La contessa seguiva la cerimonia da la finestra de la so camara e co la veleta in testa. Na storia che pare na favola e che ghe someja a tante altre de quel tempo e de quei paesi: gnente de particolare par quei de na serta età. Ma forse xe anche par questo che quando che sento parlare, o vedo dei libri che trata del popolo Veneto e de la lingua Veneta, che ancora no esiste, me vien na tristessa mortale. Mi go visto quelo che i vol ciamare el popolo veneto, magari solo la parte ultima, quela che forse stava za mejo rispeto ai so avi. De essare un popolo gnanche i se lo sognava, el fato stava fora da tuti i so pensieri. Se tratava de zente povareta, dominà in gran parte dai signori de Venessia, quei de le villevenete ancora in piè: quei gaveva la tera, el dominio e i schei. Tuti i altri che i vol ciamare popolo, gera contadini in gran parte analfabeti pieni de pelagra e de fioi da mantegnere. Tanta zente che gaveva vissùo o viveva ancora nei casoni col querto de paja o nei granari de le boarie dei paroni: conti, contesse, e nobili in genere, ma soratuto i paroni de la tera unica fonte de vita. La Serenissima gloriosa che ga dominà na parte de la storia del so tempo, no apartegneva al popolo. La sta un monopolio esclusivo, dei armatori, dei comercianti, dei nobili, del clero. El popolo gera come le galine che i ghe butava el bechime sul selese, par rancurare i ovi. Altro ch'el popolo veneto.[Domenica 15 Giugno 2008 Il Gazzettino]