liberi di pensare

Post N° 32

L’allammicu

Chi è ca è l’allammicu vo’ sapiri?
Aspetta tanticchiedda ca t’u dicu.
Malincunia ti putissi diri:
ma no! ‘stu sintimentu è troppu nicu!

Aspetta, ascuta, sì…, fammi pinsari:
è comu quannu, senza cuntintizza
firriamu ‘ntunnu senza nni firmari
ca forsi nni piacissi ‘na carizza.

E n’affruntamu e nun l’addumannamu;
è comu quannu nni sintemu granni
e semu nichi nichi e unn‘u capemu
mentri ca si nni vannu tutti l’anni!

Ma tu ca ancora sì, sì tantu nicu,
putissitu na vita mai pruvari
chistu nsocch’è: chistu: l’allammicu
e sempri filicissimu campari!

Giuseppe Jannuzzo