LI SURDATI A PRISICCE Picchi prima cu nzigna lu state de lu '42, rrivara a Prisicce do'-trecentu surdati. Pe quantu aggiu cercatu de cquai e de dhai, ciuveddhi l'ane mai muntuvati e ciuveddhi ane mai scrittu nenzi su de iddhi. Jeu, puru ca tannu tania 6 anni, me li ricordu boni, quannu nquatrati passavene de nanzi a casa mia su la via Donnica e jeu me li custava de susu a la fanescia. Tanivene li trunchetti a li pedi cu li chiovi sutta e, quannu caminavene, se santia lu scoppu su le chianche. Siccomu ca facia cavutu, scivene cu li cavisi curti e senza camisa. Tanivene lu muschettu a mpettu e cantavene “e tu biondina, capricciosa, garibaldina...” e puru “faccetta nera”. Me ricordu ca quannu li santia cantare de luntanu, jeu fuscia cu me nfacciu su lu balcone e cu me li custu. Pursione de sti surdati durmivene de costi a casa mia, a li do' palazzi de li Martani, a dhunca, a unu nc'è la putea de scarpe de lu Mariu Formosu e a l'avutru, la casa a dhu stia la Mmeli Scirocca, propiu de fronte a la via Rodolfu Sijuzzu, ca tania nu purtale beddhu deveru. N'avatra pursione de surdati ia truvatu postu ntra lu palazzu nou de li Sarracca a l'agnulu ntra via Arditi e via Cadorna de moi. Nu nniziu l'aggiu truvatu e cunta ca a menzu a l'annu de lu '42, rrivara de veru a quassutta a nui surdati paracadutisti ma nc'è ci dice ca scira a Martina Franca e ci a Ceje Messapica, ciuveddhi mmuntuva Prisicce. Sacunnu li piani de cuerra nnuminati “operazione C3”, sti paracadutisti ttuccava, ntra picca chiempu, cu se minene su l'isula de Malta e cu ne la llevene a nforza a li Nglesi. Mo, aggiu panzatu: siccomu ca lu V° battajione de sti paracadutisti, a dhu chiempu, lu cumannava lu paisanu nosciu, generale maraja d'oru, Giuseppe IZZO, put'essere ca propiu stu battajone nunn'era sciutu a Martina Franca e nemmacu a Ceje Messapica ma ia truvatu de meju vanennu a Prisicce. Me ricordu na duminaca a la mmane, versu menzidia, li surdati passara ttorna su via Donnica tutti nquatrati unu de costi all'avutru e uno de retu all'avutru, daritti daritti e quannu mpuggiavene lu pede a nterra su le chianche, se santia nu scoppu sulu. Me pare ca erene tre o quattru quatrati de surdati e sta fiata però s'ivene mmutati cu le rrobbe de parata, cu lu muschettu a manu e tanivene l'elmu ddarlampante a ncapu, ma nu cantavene. Poi, dopu dhu giurnu, nu li vitti cchiui. Dopu, ma mutu chiempu dopu, sippi ca erene partuti pe Taràntu e de dhai pe l'Africa, nu cu l'aereu pe lu lanciu su Malta, ma cu lu bastimentu pe lluttare contru li Nglesi a EL ALAMEIN. Li paracadutisti de stu battajione, pareddhi, murira tutti ccisi e ne rrimasara sulu na vintina e, ntra quisti, se sarvò puru lu stessu cumannante IZZU ma rrimase feritu. Ci nc'è quarchedunu, prisiccese o de fore, ca ne sape cchiui de mie, de stu fattu, cu se face nnanzi, cu me cunta chiru ca sape, ca me face nu piacire ranne ranne. Ci nu bole cu scrive su stu bloggu, se pote fare viu su: ginorizzo@alice.it
LI SURDATI A PRISICCE
LI SURDATI A PRISICCE Picchi prima cu nzigna lu state de lu '42, rrivara a Prisicce do'-trecentu surdati. Pe quantu aggiu cercatu de cquai e de dhai, ciuveddhi l'ane mai muntuvati e ciuveddhi ane mai scrittu nenzi su de iddhi. Jeu, puru ca tannu tania 6 anni, me li ricordu boni, quannu nquatrati passavene de nanzi a casa mia su la via Donnica e jeu me li custava de susu a la fanescia. Tanivene li trunchetti a li pedi cu li chiovi sutta e, quannu caminavene, se santia lu scoppu su le chianche. Siccomu ca facia cavutu, scivene cu li cavisi curti e senza camisa. Tanivene lu muschettu a mpettu e cantavene “e tu biondina, capricciosa, garibaldina...” e puru “faccetta nera”. Me ricordu ca quannu li santia cantare de luntanu, jeu fuscia cu me nfacciu su lu balcone e cu me li custu. Pursione de sti surdati durmivene de costi a casa mia, a li do' palazzi de li Martani, a dhunca, a unu nc'è la putea de scarpe de lu Mariu Formosu e a l'avutru, la casa a dhu stia la Mmeli Scirocca, propiu de fronte a la via Rodolfu Sijuzzu, ca tania nu purtale beddhu deveru. N'avatra pursione de surdati ia truvatu postu ntra lu palazzu nou de li Sarracca a l'agnulu ntra via Arditi e via Cadorna de moi. Nu nniziu l'aggiu truvatu e cunta ca a menzu a l'annu de lu '42, rrivara de veru a quassutta a nui surdati paracadutisti ma nc'è ci dice ca scira a Martina Franca e ci a Ceje Messapica, ciuveddhi mmuntuva Prisicce. Sacunnu li piani de cuerra nnuminati “operazione C3”, sti paracadutisti ttuccava, ntra picca chiempu, cu se minene su l'isula de Malta e cu ne la llevene a nforza a li Nglesi. Mo, aggiu panzatu: siccomu ca lu V° battajione de sti paracadutisti, a dhu chiempu, lu cumannava lu paisanu nosciu, generale maraja d'oru, Giuseppe IZZO, put'essere ca propiu stu battajone nunn'era sciutu a Martina Franca e nemmacu a Ceje Messapica ma ia truvatu de meju vanennu a Prisicce. Me ricordu na duminaca a la mmane, versu menzidia, li surdati passara ttorna su via Donnica tutti nquatrati unu de costi all'avutru e uno de retu all'avutru, daritti daritti e quannu mpuggiavene lu pede a nterra su le chianche, se santia nu scoppu sulu. Me pare ca erene tre o quattru quatrati de surdati e sta fiata però s'ivene mmutati cu le rrobbe de parata, cu lu muschettu a manu e tanivene l'elmu ddarlampante a ncapu, ma nu cantavene. Poi, dopu dhu giurnu, nu li vitti cchiui. Dopu, ma mutu chiempu dopu, sippi ca erene partuti pe Taràntu e de dhai pe l'Africa, nu cu l'aereu pe lu lanciu su Malta, ma cu lu bastimentu pe lluttare contru li Nglesi a EL ALAMEIN. Li paracadutisti de stu battajione, pareddhi, murira tutti ccisi e ne rrimasara sulu na vintina e, ntra quisti, se sarvò puru lu stessu cumannante IZZU ma rrimase feritu. Ci nc'è quarchedunu, prisiccese o de fore, ca ne sape cchiui de mie, de stu fattu, cu se face nnanzi, cu me cunta chiru ca sape, ca me face nu piacire ranne ranne. Ci nu bole cu scrive su stu bloggu, se pote fare viu su: ginorizzo@alice.it