ANNONA
Lu pruverbiu dice: sìmmana quannu voi ca a messi meti. E de veru quannu stìvene a cavaddhu de Sant'Antoni, lu trìdici de messi, metìvene prima la biava, poi l'orgiu e poi lu ranu. Li paseddhi, le fave e li pasuli, l'ìvene ggià ccoti e pisati su la liama cu la varra o cu lu maju percene le zìppere de li lacumi se spèzzene meju e li curnòcchili, quannu suntu beddhi siccati, se àprene de suli.
Lu ranu, tannu, lu metìvene a manu e ogni do' corpi de fàvice le chiante nchìvene na manu e cu tre quattru fili de ranu nturtijati tornu tornu ddavantàvene nu mmannucchiu e cu na decina de isti, ttaccati de unita, facìvene l'urriddha. Tutte le urriddhe poi mmuntunate a circhiu una susu l'àvatra, cu le spiche a menzu, facìvene lu pignune cu susu mpizzata la parma benaditta la Dumìnaca prima de Pasca.
A lu mese de l'àiere, a cavaddhu de la Madonna de lu Carminu, lu ranu beddhu siccu, lu purtàvene a l'àjara de lu Pozzi, sparpajàvene le urriddhe su l'astricu e cu li zzòcculi de lu mulu e puru cu la pasara de tufu ttaccata a rretu cu la catina, girannu tornu tornu pe ure e ure, le spiche se spriculàvene e le zzìppere se facivene a paja.
Lu state de lu '40, spicciatu de pisare, jentulamme cu le tradente e nchimme cu la pala de tàvala, cinque sacchi de ranu maperò nu tuttu ne lu trasimme a casa percé do' sacchi ttuccò cu li llassamu pe l'ANNONA.
Stu fattu me fice belanare, panzannu a la fatica ca ia fatta sirma tuttu l'annu cu ccoje dhu ranu e mo ttuccava cu ne dane, franca, na bona pursione a l'Annona. Nu sapennu, mo, ci era st'Annona, me vinne a mente la vagnona, sozza mia, ca se chiamava Annetta e cusì me mmagginai ca sirma ttuccava cu ricala li do' sacchi de ranu nosciu a l' Annona, ca ìa d'essere la mujere ranne e rassa de lu Pozzi.
Me capacitai sulu quannu fràtama lu ranne me spiecò ci gg'era l'annona e percé ttuccava cu stamu suttaposti a issa. Nfatti lu capuannona de Prisicce, pe do' fiate, requisìu lu mulu cu lu trainu e fice scire sirma fenca a Tricase cu carica rrobba e cu la nnuce a lu paese, pe cuntu de l'annona.
A Prisicce, a tiempu de cuerra, lu trenu merci nu rrivava cchiui e tutte le mercanzie pe li paesi de cquassutta a nui de lu Capu, le scaricàvene a la stazione de Tricase ca poi a dhai li Podestà mmannàvene, cumannati a nforza, li ristiani ca tanivene la vestia e lu trainu, cu càrichene la rrobba.
La prima fiata sirma se purtò fràtama e nnùssara nu trainu caricu de murali e tàvele ca scaricara a lu campu de li tedeschi susu la serra de Specchia; la seconda fiata me purtò a mie e scimme de paru a lu nunnu Virgiliu Sossiu iddhu cu lu cavaddhu sou e nui cu lu mulu nosciu.
Dha mmane mprima ìvene ppena misu sutta, quannu rrivò lu nunnu Virgiliu ca ne fice segnu cu sciamu nnanzi, ca iddhu cu lu cavaddhu ne secutava de taretu.
Rrivati a la stazione de Tricase, truvamme la chiazza china de traine e na cuardia ne fice segnu cu ne mintimu a nfila a rretu a l'urtimu rrivatu.
Sta se facìa menzidia e tanìvene ncora tre traine de nanzi nui e cusì, a guadagnu de tiempu, lu nunnu Virgiliu cacciò de poscia na ncartata e se mise cu mancia. Puru sirma ìa nnutta na feddha padunu de pane cunsata cu l'oju e quarche paparussu a lu cantru frittu cu la pasta e nzignamme a manciare, tutti de paru.
Quannu l'òmmini spicciara de caricare a spezzassu li traini cu li pacchi de pasta logna e curta (maccarruni e cannòccili), sacchi de farina e buatte ranni de cunserva, tutta robba de manciare, ripijamme la via cu ne turnamu a casa, sempre nui a nnanzi e lu nunnu Virgiliu a rretu.
Passamme de Tutinu, de Specchia, facimme la scisa a la ssuta de lu paese e nzignamme la prima mpettata de la serra. Mancu ìvene spicciatu de fare la prima girata a manu daritta ca lu mulu se ppuntiddhò a nterra e nu sciu cchiù nnanzi. Scìsime lesti de lu trainu e sirma me fice mintire na petra rossa sutta a la rota cunussia lu mulu se dava a rretu.
Quannu ne rrivò lu nunnu Virgiliu e vitti ca lu cavaddhu ne scavarcava, nchianannu sozzu sozzu, me ricordu ca rrimasi fiaccu e me piau puru la paura cunussia rrimanivene a dha mmenzu, suli e bannunati.
Dopu nu picca, ca lu mulu s'ia rripusatu, partimme chianu chianu e, quannu dopu quarche centanaru de metri cchiù nnanzi, vitti lu trainu de lu nunnu Virgiliu nchiuvatu a nterra cu lu cavaddhu jancu de scumazza pe lu suduru, rripijai fiatu e quannu lu scavarcamme, me passau la paura e cu vuce scattaddhusa, dissi a sirma:
- sarà ca lu cavaddhu de lu numnu Virgilio, nu nci la face.
De dhai nnanzi, facimme tutta na tirata fenca a Prisicce, senza cu ne fermamu mai, ma 'gnittantu, jeu girava la capu a rretu e, sulu rrivati a la vasca, vitti de luntanu lu trainu de lu nunnu Virgiliu a ncima a la serra, ca ne secutava chianu chianu.
Condividi e segnala 
