PRESICCESI NEL MONDO

LU MEJU PIATTU

Questa poesia d'autore sconosciuto, la recitava a memoria mio padre ma era zoppa di metrica e di versi. Ho cercato di completarla. Se qualcuno, però, conosce l'originale e l'autore, mi fa cosa molto gradita se me ne dà notizia.

LU MEJU PIATTU

Pe la panza, la pietanza
cchiui de custu e de sustanza
ca te binchia e te cunzola
ci pe centu piatti basta
nc'è bisognu u bai a la scola
cu capisci ca è la pasta?

L'otre cose sapuruse
me le manciu senza scuse,
sissignori me le manciu,
dopu sempre, se capisce,
ma nunn'è ca fazzu canciu
cu la carne e cu lu pesce. 

Se su fini o se su ziti,
vui diciti cci buliti,
ca su scemu o materiale
ma pe mie li maccarruni
su la cosa cchiu ssenziale 
ca me binchene i cantuni.

Ricchiateddhe ntravujate
cu le rape dalassate
menze cotte oppuru a dente,
cu lu casu duce o maru,
cu ricotta puru scante,
me le manciu paru paru.

Curti logni o minchiareddhi
sagne torte o cannuzzeddhi
cu lu burru o la ricotta
o mmiscati a li legumi,
sulu a dhai fazzu la botta
sulu a dhai perdu li lumi.

E aju oju? Cci su beddhi
fini rossi o cavateddhi;
logni logni a la furcina,
usu gnommuru e vammace,
ne nturtiju na trentina: 
me li manciu a santa pace.

Nforza a ncanna me li furnu
cu la lignua giru nturnu
e me sentu mutu riccu
e me sentu suddispattu
quannu all'urtimu me lliccu
puru u culu de lu piattu.