L'ANIMA
C . A ll'anima tua … e nci vulìa tantu cu beni? Ane cchiui de menz'ura ca te sta spettamu comu do fessi.
A . A ll'anima voscia, de tuttidoi. Ci su ddamuratu sarà c'aggiu ccapatu nu piernu, no?
B . Cci centru jeu? Pijatela cu l'anima sua ca la mia, ci l'ane mai vista.
A . Nn'imu ppena uniti e già castimi, iddhu se la pia cu l'anima mia e tie ca nu bidi la tua, comuquannu ca l'anima se vide, ciuveddhi la pote vidire.
C . Fùttitivene tantu: storta vane daritta vene l'anima mia a Mparadisu 'u bascia.
A . Bonu puru tie, cu tutti li paccati ca teni, àvutru cca Mparadisu, ci propiu propiu vole Diu, e te vane bona, l'anima tua pot'essere ca vane a Mpurgatoriu e fazza Diu.
C. La tua nvece nchiana daritta daritta a Mparadisu! Ma cci te menzi mmenu ca tie vai a Mparadisu percé teni lu fiju prevete?
B . Nu be pijati pena ca quannu muriti sciati tuttidoi cu faciti terra pe cìciri.
A . E tie none?
B . Comu no? Puru jeu, pocca, puru a mie me ttocca a dhai ma jeu nu tegnu le mire vosce cu nchianu a dhassusu, jeu me ne rrimagnu a cquassutta, a cquai su natu e a cquai spicciu, prùvele era e prùvule ddaventu.
C . Percé nui, nu facimu lustessu?
A . Cittu tie, ca nunn'ai capitu nenzi. Istu sta cunta ca quannu more spiccia tuttu, ca nu cride ca rrisuscitamu e ne nchianamu a ncelu a ncarne e osse.
C . Percé tie te cridi de veru ca scinnimu de dha susu cu ne rricujimu l'ossateddhe nosce e rispisciamu ttorna? Jeu me menzu cchiui ca ne trasimu ntra lu corpu de l'àvitri, comu se la crìdene puru l'indiani, ci l'a criati.
B . Comu dice issu la panzavene puru li primi veschi Ristiani ca a pparu a li greci ntichi, chiamavene “anemos” lu fiatu e dèsara lu nume de “animali” a le vestie ca rrafiatavene e sulu dopu se mmentara ca li ristiani tanivene l'anima.
A .Pe tie llora simu tutti animali senz' anima? Pozzu capire le vestie ca chire l'anima nu la tennu ma nui ristiani, comu faci cu dici ca nu tanimu l'anima, ci Domineddiu ne l'ane data a lu mumentu ca simu nati?
B . Vidi ca le cose nu le sai, cu tuttu lu fiju prèvete! Ci Domineddiu l'anima ne la dane quannu nascimu, me dici percé la Chesia dice ca è paccatu ci na ristiana prena se vasta cu la mira cu nu fazza nascire lu criaturu?
A . Tie vo' cu me mbroji, cci centra mo' chiru ca dici. Domineddiu l'anima la dane quannu se cria lu vagnone, puru ca dicimu …. quannu nasce. Lu tata e la mamma dannu la vita a lu fiju ma è Diu ca dane l'anima a lu corpu e lu face scucchiare pe lu bene o pe lu male e quannu lu corpu more l'anima torna attorna a ncelu e vane a l'Infernu ci s'ane compurtata fiacca e a Mparadisu ci ane secutatu li boni cusij c'ane uti e fazza Diu.
C . Nc'è puru lu Purgatoriu, ci v'a criati, cci be l'iti scurdatu?
B . L'ebrei però, nu se sape percè, dicene ca Diu dane l'anima a lu criaturu dopu 40 giurni de quannu è cuncepitu e li previti de l'oriente dopu 120 giurni.
C . E cci te ne futti ttie de chiru ca penzene a dhe vanne, tantu l'anima nu la teni.
A . Dinnanala ca nui facimu comu dice lu Papa nosciu e nu ne ncaricamu de l'avitri.
B . Ma ci lu Diu vosciu è a pparu a chiru de l'Ebrei, comu è ca de lu Nticu Làscitu pijati sulu chiru ca ve vane a geniu? Istu è bonu e istu è fiaccu, istu ne piace e istu none, comu lu sacunnu cumannamentu ca l'iti scanciatu de sana chianta a paracone a chiru ca Diu, comu diciti vui, dese a Musè.
C . Puru tie però ne cacci sempre una nova, ci t'a criatu, de dhu li piji tutti sti saletti?
A . Pe chiru sarà ca teni raggione, ma comu facivene li primi veschi cu cunvèrtene li pacani a lu Cristianesimu ci nu facivene bidire mmenu na ficurina de Cristu e de la Madonna, propiu a chiri ca erene bituati cu vardene le beddhe statue de marmulu de li ddii loru?
B . A cquai te spettava, beddhu meu, vui, li pacani l'iti mbrujati cu le prediche fàvese, dicennu: ca l'urtimi su li primi, ca l'avitri n'annu vvulire bene comu nui vulimu bene a iddhi, ca ci more a nume de Diu, l'anima sua nchiana a ncelu a ccosti a Iddhu e lu corpu ndrafisca e spiccia de tribulare su sta terra fenca a lu “tiesilla”.
C . Se dice puru ca ci te dannu nu scaffu a nfacce, ttocca cu giri la capu de l'avatra menza cusì te ne ncoddhene n'avutru, macari puru cchiù beddhu rossu.
A . Diu ane criatu l'ommu a ssamijanza sua e l'ane llassatu libburu cu scucchia lu bene o lu male.
B . E comu faci cu dici ca l'ommu ssamija a Diu ci lu Diu tou nu ll'ane vistu mai ciuveddhi? E comu faci cu dici ca Diu ane llassatu l'ommu libburu cu scucchia, quannu nu faci avutru cu dici, mijara de fiate lu giurnu: ci vole Diu?
C . Cci ccentra mo stu fattu, ci t'a criatu, e ccertu cca ttocca cu dicimu: ci vole Diu.
A . Li ristiani nascene tutti cu l'anima santa ma poi scantunene e cu lu chiempu se vàstene e fazza Diu.
B . Ci poi l'ommini se vastene cu lu chiempu, me pare ca nunn'ane mancu spettatu mutu, ci dopu picca: Cainu ccise fravasa pe cilusia; Abramu se unìu cu la serva, cu li fazza nu fiju, e poi, quannu li nascìu Isaccu lu fiju licitimu, ne cacciò de casa, la serva cu lu fiju e li mmannò sperti e damerti ntra lu desertu; lu Isaccu, su lettu de morte, foe pijatu pe fessa de la mujere ca li fice benadire Giacobbe a ppostu de lu fiju cchiu rranne, Saù; lu Giacobbe, cu nu face la fine de l'Abele, ttuccò cu se ne fusce luntanu a dha lu ziu e spusò, unadopulavatra, le do' cucine e fice na barca de fiji e, ntra de issi, se vulivene cusì bene, ca li cchiu ranni se vinnira, comu schiavi, li cchiu piccinni.
C . Li sordi càccene l'occhi puru a lu diavulu. Ci sape quantu ccucchiara, ci l'a criati!
A . L'anima cusija lu bonu ma lu corpu se ne futte e pija le fiacche vie e fazza Diu.
B . Ma quale anima, è sempre Diu ca face cci bole. Pijamu lu Nuè, ca pareddhu stia a ngrazie de Diu, quannu li vinne a ricchia cu llassa tuttu e cu fràbbica nu barcune percé a Iddhu l'ìa vanuta la ula cu face la ddalluju.
C . Menumale ca lu vvisò a chiempu!
A . Pocca, menumale, comu dice issu, ca cusì, sarvò tutte le razze de li ritiani e chire de le vestie e fazza Diu.
B . Nu me pare ca Nué, dha fiata, tinne fìcutu, anzi se la fice sutta pe la paura cunussia muria nfucatu e se ne futtìu ca murivene tutti li ristiani e tutte le vestie de lu munnu.
A . E cc'ìa pututu fare, pareddhu, a frunte a la nniputenza de Diu?
B . Nuè ìa ttuccatu cu ppuntiddha li pedi a nterra e ìa utu rrispunnire: o ne NFUCHI TUTTI o CIUVEDDHI!
Condividi e segnala 
