PRESICCESI NEL MONDO

LE FICURINE

LE FICURINE

A dhi chiempi, la sira notte de state, spicciatu de sciucare a carte a nnanzi a lu barra, senza mancu cu ne damu vuce, ne partivene tuttideparu cu ne facimu la caminata a la “villa”. Se dicia a la villa ma ne scaffavene mutu cchiu nnanzi, a fiate rrivavene fenca a la stuccata pe li Saccursi, eppuru dopu. A lu primu capanneddhu de carusi, caminannu caminannu, se ccucchiavene avitri vagnoni e a fiate rrivavene fenca a vinti parsuni e cchiui. Nc'era ci cuntava de scola, ci de fatti ccappati frischi, ci cuntava culacchi pe ridire e poi tuttuccotu unu ntunava na canzune e llora tutti ne mintivene a cantare cu tuttu lu fiatu ca tanivene a ncorpu. A quiddh'ura nu passava ciuveddhi e nui caminavene chianu chianu sparpajati pe tutta la via. Erene tutti ntra de nui masculi e pe li bisogni bastava cu ne cucchiamu a lu parite e, de suli o a cumpagnia, canciavene l'acqua a le vulie. Nc'era puru ci tania de fare cose rosse e llora zumpava lu pariteddhu e spicciava a ntra la vigna de le Fùnnere.

Na sira lu Vittoriu nchianò su lu parite e a lu scuru, zumpò de sutta. Tuttuccotu ntisi cridare la castignata cchiu rossa ca ia mai ntisa: “Mannaggia a centu metri de ficurine de santi poste una de costi a l'avatra”. Pocca, cadennu, pareddhu lu Vittoriu, squicciò cu lu pede nu “bisognu” beddhu rossu de la sira prima. Tutti mo spurramme a risi, mmagginannu cc'era ccappatu. Jeu, me ricordu, ca rrimasi fiaccu percé, cchiui o menu lu Vittoriu, cu na sula castignata, ia ziccatu cchiui de 1.600 Santi ca mancu tra le litanie logne, nci ne su tanti.

Stu fattu m'è banutu a mente chiempu rretu e cusì m'aggiu ricurdatu de quannu ntra lu libru de le cose de Diu, a na pagina sine e a una none, tania nfilata na ficurina. Li Santi pittati erene tanti ma chiru ca futtia tutti nunn'era né Santu Ndrea lu protettore de Prisicce né Sa Lluviggi, 'u Santu meu, ma era Sant'Antoni de Padua. Cchiui de Sant'Antoni poi nc'era Gesucristu: chiru ppena natu, chiru vagnone, chiru a Ciommu, chiru cadutu sutta la Croce, chiru nchiuvatu susu, chiru mortu stisu, chiru rrisuscitatu e chiru cu lu core a mpettu, lu Coredegesù. Ma ci de veru, tania cchiu ficurine de tutti, era la Madonna. De Issa, nc'erene tutte chire de la vita sua de quannu fu Nnunziata de lu Carbieli a quannu foe Ssunta a ncelu passannu de le Mmaculate e de le Cuncepite. Nci nn'erene poi nu saccu e na sporta de Madonne cu lu nume: de nu pescu, de nu munte, de na concateddha d'acqua, de na cisura, de na via, de na rutta, de nu paese e de ci cchiui ne sape cchiui ne minte.

Facennu ficuzione, me ncorgu ca li sciudei nu tennu statue nè quatri nè ficurine: né de Diu, né de li Santi né de le Madonne percé nu li vole lu sacunnu Cumannamentu, ca nunn'è chiru ca n'annu mparatu de vagnoni a le cose de Diu, però è chiru ca Diu dese tannu a Musè e ccumenza: “nu te poti fare na statua o nu quatru de chiru ca nc'è susu a ncelu o a nterra o ntra l'acqua o sutta a la terra. Nu te nginucchi nnanzi a issi e nu li faci de servu percé jeu, lu Signuru, suntu lu Diu tou e su nu Diu cilusu; jeu cunnannu le malefatte de li tata ca ttocca cu le scuntene li fiji fenca a la terza o a la quarta generazione, pe chiri ca me volene male, ma suntu bonu, fenca a la millesima generazione, cu chiri ca me volene bene e sèquetene li Cumannamenti mei”.

Ci li Cumannamenti, cumu dice la palora stessa, suntu leggi cumannate de Diu e, ci nu se face comu nc'è scrittu, è paccatu rossu, comu è ca le Chesie Ristiane su chine de Santi e Madonne? Se face paccatu quannu unu se nginucchia a nnanzi a Cristu ncroce? Fice paccatu la Santa Tresia d'Avila quannu se nnamurò de Gesucristu a puntu ca pruvau custu ntra li carni, sulu cu lu varda? Tutti chiri ca, pe vutu, rricalene cose d'oru e d'argentu a le Madonne o istu o dh'avutru Santu, a l'occhi de Diu, fannu paccatu? Sti rricali, puru ca suntu senza sagnu, nu ne fannu vanire a mente li sacrifigi ca facivene li nnantisciuti pacani?

La Chiesia dice ca lu Diu è Unu Sulu e ca simu tutti fiji de lu stessu Diu, sia ca simu Ristiani sia ca simu Sciudei e, me crisciu ca li primi papi Ristiani, pe lu bene de la Chesia, ttuccara cu cancene lu sacunnu Cumannamentu cu la mira ca li pacani ddavantavene Ristiani senza cu perdene le sanse de li nnantisciuti loru.