Creato da lgcasc il 06/09/2013

PRESICCESI NEL MONDO

Spazio d'incontro dei presiccesi

 

« LI VERBICI A LE STIDDHE E CI A L... »

TIESILLA

Post n°181 pubblicato il 13 Gennaio 2022 da ginoscirocco

 

TIESILLA

     

  • Venerinaa, llàssili lu coppullinu a ncapu, fija mia, cusì stane cchiu cautu.

  • Ma è mortu, mamma, cci se ne face cchiui, lu tata, de lu coppullinu.

  • La cautela è sempre cautela, fija mia, puru ca lu tata è mortu.

  • None, mamma, mo rrivene li fratelli de la Ssunta pe lu Tiesilla e voi cu lu trovene cu lu coppullinu ncora ncapu?
    Stu cuntare lu ntisi dha mmane de muti anni rretu quannu, ncora piccinneddhu, ne pprasantamme, jeu e mama, a casa de lu Scarpante ca stia ntra la strìttala ca face agnulu, ma tanivene le ssute ca ncorparavene e de dhai, la mmane mprima, ìvene ntisi li cridi e li chianti.
    Dopu picca ca stavene a dha intra, rrivara li tre fratelli, vistuti cu le rrobbe de uttisciana, senza càmisu e senza muzzetta, se ssattara a ntornu a lu lettu e se misara a cantare ca nu la spicciavene cchiui. Tanivene tuttu a ncapu e cantavene tutti de paru e senza cu se fermene mai. Jeu nu ziccai mancu na palora de tuttu dhu cantu de chesia e me ncorsi ca mancu mama lu sapia bonu, percé mmuvia sulu li musi, ma nu cantava.
    Lu Tiesilla, pe ci nu lu sape, è lu cuntu de chiru ca se ccappa DHU GIURNU quannu spiccia lu munnu e nui ne nchianamu a ncelu a ncarneosse e l'anime de li nnantisciuti nbece, scinnene su la terra cu se pìjene lu corpu loru e poi se ne tòrnene a ncelu. A dha susu tutti de paru poi, spettamu cu sapimu, ci pe ci sa, vanimu sciudacati: boni cu restamu ampressu a Diu o fiacchi cu vanimu scunfunnati ntra lu focu de l'infernu.
    Stu cuntu l'ivene sempre predacatu tutti li prufeti de quannu era nzignatu lu munnu fenca a l'annu de lu Signore 1250, qannu nu ccertu Tumasi de Celanu, monucu de Saffranciscu, lu scrisse a canzune, cu la mira ca li ristiani, pe la paura de l'infernu: ddavantavene cchiu boni, se raccumannavene, mmane e sira, l'anima a Diu e facivene dunu de rrobbe e de sordi a la chesia a scuntu de li paccati de li vivi e de li morti.
    Mo m'è banutu a ncapu stu Tiesilla percé sta se sparge uce ca lu curuna ne l'ane mmannatu Domineddiu comu segnu de la fine de lu munnu. Li prufeti de tutte le lèbriche annu cuntatu e cuntene ncora, ca DHU GIURNU:

  • TUTTI nui ristiani vii de TUTTU lu munnu ttocca, tuttu de paru, cu murimu tutti de paru e poi ne nchianamu a ncelu a ncarneossa;

  • TUTTE l'anime de li nnantisciuti, scinnene su la terra, se pijene lu corpu ca tanivene de vii e se ne tòrnene attorna a ncelu;

  • TUTTI poi, morti de tannu e morti frischi, ttocca cu sciamu, secutannu lu sonu de la tromma, a la valle de Giosafatta pe l'Urtimu Giudiziu.
    Ditta cusì, nu me pare cosa ca se pote fare de lu osci a lu crai, ca puru cu mori nci vole lu chiempu sou. Mintimu puru, ca lu curuna, lu culera, lu vaiolu, la peste bubbonica, lu carbonchiu, la malaria, la spagnula, la tubercolosi, lu tifu e tutte l'avetre malatie, ne rrivene tutte de paru, nu se pote mai fare lestu lestu, ca nc'è sempre chiru ca tene lu cojuru cchiu tostu e more dopu l'avitri oppuramente ca troa la medicina giusta o lu vaccinu bonu e nu more pe nenzi.
    Me pare ca putia turnare lu ddalluju, ma puru pe quistu nci volene cchiui de quaranta giurni de mmalechiempu cu l'acqua ca la mina a “comu Diu la manna” e nc'e sempre chiru ca stane su lu pizzu de munte a dhu l'acqua nu pote rrivare mai, nu se nfuca e se sarva. Ma poi, pe dittu, Domineddiu se ddispiaciu mutu cu l'urtimu ddalluju e prumise ca nu ne nfucava cchiui cu l'acqua.
    Meju è nu beddhu tremulizzu de terremotu su tutta la terra cu li trabbucchi ca se aprene e gnùttene, ntra na sbutata d'occhi, tuttu e tutti. Me crisciu però ca nu se po' fare, ca moi la terra staci rriggetta, s'ane ndrafaddhuta, nunn'è cchiui chira de mijardi d'anni rretu. Nci suntu ncora li vesuvi ca spatterrene ogni tantu cquai e dhai ma nu su boni, me menzu, cu ne rrostene tutti de paru ntra nu giurnu, ca nc'è sempre chiru ca stane mutu luntanu e la face franca.
    Rrimane comu urtimu rrimediu, pe lu scatafasciu generale o “Poca Lisse”, comu la mmuntuvò Sagiuvanni, nu beddhu tuzzu de la Terra contru la Luna o contro na pumeta o n'avutru beddhu pescu rossu ca nata a ntra l'aria e ca 'gnittantu se face bidire a li paraggi nosci. Sulu cu nu scoppu cusì rrossu, stamu scuscitati ca la morte de tutti li ristiani de lu munnu rria ntra nu vidi e sbidi e ne putimu nchianare tutti de paru a cuspettu de Diu.
    Truvatu lu sistema de comu imu mmurire tutti de paru, nasce lu prublema pe l'anime de li nnantisciuti, pareddhe, ca quannu scinnene cu pijene pussessu de lu corpu, ai voja cu girene de na menza a ll'avatra, ntra tuttu dhu ntravuju, nu trovene mancu na rancateddha d'osse. Pesciu poi, è pe l'anime de chiri ca su stati brusciati e la cinnere sparnuzzata a lu jentu, de chiri nfucati a ntra mare e manciati de li pescicani, de chiri morti de curuna, ca vannu de na menza a l'avatra de sabburcu a sabburcu e nu trovene na stozza de terra bona, cu pijene rriggettu.
    A cunti fatti, me crisciu, ca la “Poca Lisse”, ca li prufeti pe mijara e mijara d'anni n'annu tanuti su li crauni ddumati cu la paura, cci pe ci sa, ccappava a lu crai pescrai, nunn'è ncora rrivata e nu rria mancu moi e, me sa, ca ttocca cu spattamu ci sape quante mijara d'anni ncora.
    Ci, poi, comu “Poca Lisse” panzamu a la scumparsa, a llognu scire, de li ristiani de la facce de la terra, llora sì ca stamu su la bona via percé ne sta distruggimu chianu chianu de suli, senza la manu de Diu e senza li scumpiji de la terra. Murimu pe l'aria mbelanata ca esse de le fucagne de le frabbiche e de le machine, nu sulu pe l'aria ca gnuttimu ma puru pe chira càvata ca cria li mmalechiempi e ca squaja la nive e, spicciamu cusì nfucati, cu l'acqua ca scinne de susu e chira ca nchiana de sutta e ci s'a vistu s'a vistu.

 

 
Commenta il Post:
* Tuo nome
Utente Libero? Effettua il Login
* Tua e-mail
La tua mail non verrà pubblicata
Tuo sito
Es. http://www.tuosito.it
 
* Testo
 
Sono consentiti i tag html: <a href="">, <b>, <i>, <p>, <br>
Il testo del messaggio non può superare i 30000 caratteri.
Ricorda che puoi inviare i commenti ai messaggi anche via SMS.
Invia al numero 3202023203 scrivendo prima del messaggio:
#numero_messaggio#nome_moblog

*campo obbligatorio

Copia qui:
 

AREA PERSONALE

 

TAG

 

ARCHIVIO MESSAGGI

 
 << Marzo 2024 >> 
 
LuMaMeGiVeSaDo
 
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31
 
 

CERCA IN QUESTO BLOG

  Trova
 

FACEBOOK

 
 

ULTIME VISITE AL BLOG

prefazione09ginosciroccoaida631m12ps12annamatrigianopoeta_semplicedony686cassetta2gryllo73ibanez92gMiele.Speziato0marabertowclock1991lucylla_sd
 

ULTIMI COMMENTI

CHI PUÒ SCRIVERE SUL BLOG

Tutti gli utenti registrati possono pubblicare messaggi in questo Blog e tutti possono pubblicare commenti.
 
RSS (Really simple syndication) Feed Atom
 
 
 
 

© Italiaonline S.p.A. 2024Direzione e coordinamento di Libero Acquisition S.á r.l.P. IVA 03970540963