Creato da lgcasc il 06/09/2013

PRESICCESI NEL MONDO

Spazio d'incontro dei presiccesi

 

« LU SCIARDINULI CUMANNAMENTI »

LU BARCUNE

Post n°187 pubblicato il 20 Febbraio 2023 da ginoscirocco

LU BARCUNE

A UR, na mmane de 5400 anni rretu

Nuè - V'aggiu ddiscitati mprima, stammane, ca v'aggiu dire na cosa mutu ma mutu rossa: ne vane de menzu la vita de tutti nui. “Sem, essi a dha fore e vidi cunussia nc'è ciuveddhi ca mpizza ricchia a chiru ca v'aggiu ddire”.

Sem - Putimu stare scuscitati, tata, nu nc'è ciuveddhi e chiri de costi, sta dormene ncora a sonnu chinu.

Nuà -  Cci centru jeu cu chiru c'ai ddire tie; mo, cu le nore mei, vau cu mmarennu ca jeu prena suntu!

Nuè - Nunn' iti capitu nenzi. Lu cuntu vale puru pe bui fimmene, ca mo ttocca cu giurati “su Diu” ca ste cose nu l'iti ccuntare a ngiru, patteculisciannu cu l'avetre.

Cam - Tata t'ai zatu moi o ai già mmarannatu cu la suppa de mieru?

Jafet - E spìcciala, scòrnetene cu dici c'a llu tata li piace lu mieru, sta dice cose rosse.

Nuè - Lu llassu pèrdere, ca nc'è bisognu puru de lu jutu sou, maperò, ci nu face comu li dicu jeu, pe quantu è veru Diu, de ndravutu com'è, fazzu cu ddaventa nìvuru pe le mazzate ca li do e lu llassu puru fore de lu barcune cu ùnfula ntra l'acqua.
Nuà - Lu vagnone scherza, spiccia cu cunti mo, nu la fare mutu logna.

Nuè - Allora nzignu cu be cuntu lu sonnu de stanotte. Iti ssapire ca nn'anciulu m'ane dittu ca Domineddiu nu ne sopporta cchiui pe li muti paccati e, cu se la scunta, ne manna tanta de quidd'acqua ca vole cu mmurimu tuttinfucati.

Jafet - Allora ttocca cu mparamu a natare comu li pesci?

Nuè - None, m'ane cusijatu cu fazzu na varca ranne cu ne mmantegna tutti a ngalla.

Sem - Sta me cridia quantu ranne, basta puru una piccinna pe nui ottu e li vagnoni.

Nuè - Ci me faci cu spicciu de cuntare ve dicu ca imu caricare puru na cucchia de tutte le vestie, percé ci morene, nui poi, cci manciamu?

Nuà - Comu se nfuchene, i ceddhi volene e l'avetre vestie se ne vannu su li munti e poi quannu scampa se ne scinnene e tuttu ddaventa comu prima.

Nuè - Nuà, nunn'ai capitu nenzi! Stu ddalluju dura quaranta ddie e quaranta notti e pe tuttu stu chiempu chiove, comu Diu la manna. L'acqua se azza tisa tisa cchiu susu de li titti de li munti e tutti li ristiani e tutte le vestie ca nu trasene a ntra lu barcune nosciu, li tocca sse nfuca.

Nuà - Focu meu, comu fazzu cu stu fiju ca tegnu a ntra ventre? Sarà ca è meju ci purtamu cu nui lu macaru mmammanu.

Nuè - Aggiu dittu ciuveddhi, sulu nui.

Cam - A mie, tata, nu me basta mujerama, me pozzu purtare la fia de la Sara?

Nuè - E cci cuntu arabu? V'aggiu dittu ciuveddhi e ciuveddhi ane d'essere. Nenzi macaru, nenzi fija de la Sara, nenzi nonni, nenzi zii e nenzi naputi.

Jafet - E mancu lu fiju masculu c'a m'ane fattu la Lia? Chiru sine no, tata?

Nuè - Sulu ci ne lu llassa a mujerata si no: no. Ca ci nzigniamu a fare a ci fiji e a ci fijiasci, nu la spicciamu cchiui.

Sem - Ma ci nci vole na varca cu trasimu tutte le rrobbe nosce e lu manciare pe nui e pe tutte le vestie, ci sape quantu l'imu fare ranne?

Nuè - Diu vide e pruvide e cusì Iddhu m'ane date le misure: logna razze 300, larga razze 50 e tisa razze 30.

Cam - Tata puru lu porcu trasimu?

Noè - Pocca! Tutte le vestie pure e mpure, sia cu lu zzòcculu chinu cca cu luzzòcculu spaccatu, chire de pilu, chire de pinna e puru chire ca striscene a nterra.“Sem, vane ttorna e bidi ci pe ci sa isti de costi a nui, mpìzzene ricchia”.

Sem - None, tata dormene ncora.

Nuè - Allora apriti boni l'occhi e le ricche. Stu barcune cusì ranne nu la putimu fare de suli e ttocca cu ne facimu jutare de tutti l'avitri ristiani. Ma nunn'ìmu spruvare ca Diu ne manna lu ddalluju, ca si no fessi suntu cu ne jutene. Llora imu ccuntare tutti lu stessu cuntu. Imu dire ca: “Domineddhiu m'ane cusijatu cu piàmu la via de lu fiume, cu ne sciamu a munte, a ddhu m'ane ssicuratu ca se stane meju, ca poi li mmannamu a pijare cu se ne vennu tutti appuru a nnui.

Sem - Cci fazzu, tata, vau cu vannìsciu?

Nuè - Sine spargi uce. Dinne a tutti chiri ca ffrunti ca jeu, capu de li capi, pe bula de Diu, voju cu fazzu na festarra lu giurnu de la luna tunna. Ne rricujimu tutti a quannanzi sutta a la gnàgnala a dhunca nci su le chianche de l'artare. Dilli cu nu bennu cu li mani mmanu ma cu nnucene scenchi e castrati, aviniceddhi e crapetti, ma cusì tanti, ca lu ndoru de la carne rrustuta ane rrivare fenca a dha susu a Diu. (a lu crammane)

Nuà - Puru stammane t'azzi mprima? A dhu te tocca a quist'ura ca lu sule nu se vide?

Nuè - Essu cu fazzu l'acqua ca ierisira aggiu busatu cu lu mieru. (dopu nu picca)

Nuà - Nc'iai misu tuttu stu chiempu pe do' cocce d'acqua?

Noè - Trovi sempre ncicchinnonne, tie. Nu lu sai ca tegnu 600 e passa anni e me scinne cu lu cuntacocce? Senti mo, osci vennu tutti e dopu la manciata, ttocca cu li mmiziu unu pe unu a chiru c'annu ffare de crai a nnanzi. Cu bidi mo' a dha ffore, li strafizzi? nc'è cu te mini li mani a li capiddhi! Jerisira tardava cu piu sonnu, panzannu a quanti ristiani e a quante sciurnate de fatica nci volene cu struncunamu centanare de pedi de pignu, ma mmagginannu ca chira era la ula de Diu, me zziccò lu sonnu e ntisi la uce de l'ancileddhu ca me prumintia, pe stammane, tutti li fierri fatti mposta pe lu barcune. E nu boi ca, mo ca su ssutu a dha fore, nu stannu stisi a nterra unu de costi a l'avutru? Maperò, jeu nu ssacciu comu li putimu maneggiare.

Jafet - Tata, lu sai ca quannanzi nc'è na rota cu la catina ca quannu gira struncuna li pedi de lu voscu. Nu bisciu l'ura cu fazzu comu m'a mmusciatu dhu carusu, stanotte a nsonnu.

Cam - Tata, tata, s'ane vveratu lu sonnu c'aggiu fattu. A quannanzi nc'è nu tavulune logNu cu lu sarracchiu ca gira e face a feddhe logNe puru li truncuni rossi.

Sem - Tata, Diu ne vole bene deveru! Stanotte m'è banutu a nzonnu nu carusu ca m'ane fattu bidire: comu aggiu sciuncire li tavuluni pe l'ossatura de lu barcune e cumu aggiu ncuddhare fitte fitte le tàvele una de costi a l'avatra cunussia se nfiltra l'acqua.

Nuè - Menumale pe sti fierri ca n'ane mmannati Domineddiu, fiji mei, si no comu ivene pututu fare? Quannu spicciamu lu barcune però, li precamu a nterra e la moja ca rria cu lu ddalluju, face lu restu. Ci poi, li fili e filori, ca rrivene ntra mijara d'anni, ne sentene lu bisognu, se li mmentene de suli!

 
Commenta il Post:
* Tuo nome
Utente Libero? Effettua il Login
* Tua e-mail
La tua mail non verrà pubblicata
Tuo sito
Es. http://www.tuosito.it
 
* Testo
 
Sono consentiti i tag html: <a href="">, <b>, <i>, <p>, <br>
Il testo del messaggio non può superare i 30000 caratteri.
Ricorda che puoi inviare i commenti ai messaggi anche via SMS.
Invia al numero 3202023203 scrivendo prima del messaggio:
#numero_messaggio#nome_moblog

*campo obbligatorio

Copia qui:
 

AREA PERSONALE

 

TAG

 

ARCHIVIO MESSAGGI

 
 << Marzo 2024 >> 
 
LuMaMeGiVeSaDo
 
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31
 
 

CERCA IN QUESTO BLOG

  Trova
 

FACEBOOK

 
 

ULTIME VISITE AL BLOG

prefazione09ginosciroccoaida631m12ps12annamatrigianopoeta_semplicedony686cassetta2gryllo73ibanez92gMiele.Speziato0marabertowclock1991lucylla_sd
 

ULTIMI COMMENTI

CHI PUÒ SCRIVERE SUL BLOG

Tutti gli utenti registrati possono pubblicare messaggi in questo Blog e tutti possono pubblicare commenti.
 
RSS (Really simple syndication) Feed Atom
 
 
 
 

© Italiaonline S.p.A. 2024Direzione e coordinamento di Libero Acquisition S.á r.l.P. IVA 03970540963