PRESICCESI NEL MONDO

NU NC'E CIUVEDDHI

NU NC'E' CIUVEDDHI

Cunta Omeru ca Crise, lu prèvete de lu diu Apollu, sciu a dha lu rre Agamennune cu se face dare rretu la fija Criseide ca lu rre se l'ìa pijata cu la forza. Quannu lu prevete se vitte lluntanare de li surdati a maleparole, zò l'occhi a lu munte Olimpu e dimannò jutu a lu diu sou ca, senza ai né bai, mmannò mprima mprima la pestilenza, facennu murire nu saccu de surdati.

Lu rre, mpauratu cunussia la nfezione zziccava puru iddhu, mmannò a rretu a dha sirsa la carusa maperò vose a scanciu la beddha Briseide, cumpagna de Achille.

Aprite celu! Achille, puru ca nu tania tantu bisognu de fimmene, ca se ccumpagnava già cu l'amicu Patròclu, nu la pijò bona lustessu, ndrizzò l'occhi a l'Olimpu versu màmmasa pe nu jutu e poi, cu la vuce tisa, cu se fazza ssantire de lu rre e de tutti chiri ca stàvene a ntra lu ccampamentu de surdati, cridò: - rre Agamennune, jeu nu lluttu cchiui pe ttie e la cuerra, de moi a nnanzi, te la faci apparu a dhu curnutu de fràvata.

A dhi tiempi, li ristiani se menzàvene ca li ddii abbitàvene su le cime de li munti a dhu ciuveddhi se rriscava cu nchiana e, de dha susu sti ddii e ddie vidivene tuttu e tutti e mmannavene lu “bonu o lu fiaccu” a ll'òmmini a sacunnu de ci facivene cose bone o fiacche e puru de ci li purtavene le giuste diuzioni e gNulature de carne rrustuta.

Poi, quannu quarche ristianu cchiù tantariculu nchianò de scusi fenca a lu cucurùzzulu e se ncòrse ca a dha susu a li munti nu nc'era ciuveddhi, li prèviti se mmentara ca li ddii, fatti de spiritu, putivene nchianare a ncelu cchiu susu de li ceddhi e de le nùvele, addhù s'ivene criatu n'agNulu tuttu pe iddhi, a dhu stivene tutti rricoti, e de dhunca tanìvene sutt'occhiu li ristiani, notte e giurnu.

Li Babilonesi, cu scòprene li ddii a ncelu, nzignara cu fannu la ziccurat, na turre tisa tisa ma nu la pòttara spicciare ca se mbrujara le ligNue e pèrsara lu fattu pe lu ffare.

Quannu, tantu tiempu dopu, cose de lu seculu passatu, l'ommini nchianara tisi a ncelu vulannu cu l'apparecchi, tutti mo se cridìvene ca finarmente li ristiani scuprivene a dhu stavene ccucciati li ddii e le ddie e a dhu ìvene cunzatu l'infernu e lu purgatoriu. None, mancu issi vittara nenzi.

Poi, dopu tanti àvitri anni, l'ommu nchianò cchiù tisu a ncelu cu lu gettu, mancu sta fiata vitte razza de ddii e mancu vitte l'anime de l'infernu né chire de lu purgatoriu.

- Fessi! Disse n'ommu de chesia, ca se l'anime su fatte de spiritu, comu fannu cu se fannu bbidire de nui?

Puru issu tania raggione, ci la criatu, ma quannu l'ommu foe sparatu cu lu strarazzu e nchianò cchiu susu de le nùvele tise, fenca quasi a pparu a la luna, all'artezza cchiui o menu de lu paradisu e puru cchiù susu, puru sta fiata nu bbìtte ciuveddhi.

•  

  • E se capisce – disse l'ommu de chesia - ca nu bitte ciuveddhi, ca puru l'anime de lu paradisu suntu de spiritu e nu se fannu bidire fenca a lu giurnu de la

“poca lisse” quannu scìnnene a nterra, se rripijene lu corpu e vannu a la valle de jGiosafatta pe l'urtimu giudiziu.

- A cquai te sbaji de rossu – rispuse lu saputu - caru ommu de chesia meu -, percé armenu li corpi de Cristu e de la Madonna l'èrene uti bidire ssattati, unu a manu daritta e l'avutra a manu mmersa de lu tronu celeste a dhu stane ssattatu Domineddiu e ivene utu bidire puru, stisu llattaluni a nterra facciffrunte a lu tronu, lu prufeta Maumettu, ca de susu a la cùpala de la chesia “De la Roccia” a Gerusalemme, era nchianatu, puru iddhu a ncarneossa, a li “sette celi”-.

Poi, a dha susu, tornu tornu a lu tronu celeste, ìvene utu bidire, pe dittu de le chiesie, puru lu corpu de: Adamu, Abramu, Enoch, Elia, Elisiu, Musè, Aronne, Sagiuseppe, Sagiuvanni, lu diu Odinu, lu diu de Babele Tamuzzu, lu diu Yaridu de li slavi ma sulu de jernu issu ca, cu lu tiempu bonu, se ne scinnia ttorna a nterra.