Area personale- Login
TagCerca in questo BlogMenuUltimi commentiChi può scrivere sul blog
Solo l'autore può pubblicare messaggi in questo Blog e tutti gli utenti registrati possono pubblicare commenti.
|
Post n°37 pubblicato il 08 Febbraio 2008 da diadetti
Calä la calabrosä , la par dré a fiocà sitilä zó dal ciél seré serénènt, el giàs löster an terä, sterlüsènt, la zènt tacadä ai mür per migä biöscà. Dò pöté a braceto per sta 'n pé, on nono col mantel e col bastù, sgnaulä on gat söi cóp deanti a mé, sbarbelä 'l ciar dal fret an d'en lampiù. Vardä la lünä biancä come la lüs an mès a 'n ròs de stèlé ensornadé 'ndel blö cartä de söchèr, le stèrlüs ; la not l'è fredä, le stradé j-è zeladé. On s'citulì péssèn con de sò padèr a l'osteriä del Moro co la gazosä el vardä fò dei vedré zó de squadèr vergót che se möf sö a na quàc fozä. Aliurä el valsä sö la spadoletä e 'l dèrf l'ös e 'l restä lé 'ncantàt : ghè 'n'òm co 'n'àsnä tötä 'nfredolétä che 'l ghe fa 'l vèrs a Giosèp, disgrassiàt. Ghè udur de föm, de tripä e vì, da la cantinä é sö spissùr de möfä, i òm che zügä a murä i fa casì, e i siòr : vigliàc se mai che giü 'l sa stöfä. El poèr s'citì, en mès a sté bordèl, el s'empapinä vià ona quàc vóltä, e po' 'l sa resbaldés fò sö l'oradèl del taól, 'l vörès dormèr, chi l'ascoltä ? Furä i calsitù de lanä sgrèzä söi galù, on ciuchitù el ghe slongä tré züchì, sò padèr l'è tròp ciapàt col brisculù, l'óstérä la ghe dà dò caré, e on basì . Apò chèstä l'è stadä ona not de Nedàl ; chi l'à éstä l'è ché amó per cöntàl, ghìä gnà pegoré, gnà pastùr e Bambì, ma sul on'ósteriä en dó i vindìä 'l vì .
Post n°36 pubblicato il 03 Febbraio 2008 da diadetti
Tag: l'óstérä De óstéré de 'na óltä ghè n'è pö, adès ghè le baristé e per de pö le fa gnè bröt gnè tripä per passiù; formai de tarä e rènc j-è miä pö bù. Póc sö póc zó finä a sinquant'àgn fa per osterié se 'nàä apò per mangià óna scödelä de tripä con de 'l pà... e ghìä l'óstérä a fa i unur de ca'. L'è stadä per tàcc àgn l'incarnassiù del prét quant che 'l te fa la confessiù, la n'à sintìt de ògné de dré al sò bancù e, sensä taté stórié ... a töcc l'assolussiù.
Post n°35 pubblicato il 31 Gennaio 2008 da diadetti
Tag: ariä de frétolé Òjo che boi an de le casé, canèlé che laurä la fojadä, cügià de lègn che girä la pastelä, vanigliä e söchèr a vél a braché, e boché de s'cècc mai straché. Le fretolé e latüghé de le noné le molä el sò udurì en de per töt e par che 'nfin la ghebä la profumé e mé só aleghèr come on gnarèl, la fómnä 'ntat la spand söchèr a vél .
Post n°34 pubblicato il 24 Gennaio 2008 da diadetti
Tag: Endó sarai finìcc ? endó sarai finìcc ? I lümì che sbarbelàä söi pràcc co rane e grìi a sunà l'urchistrinä, orès saì endóe che j-è scapàcc o se ga s'è s'ciopat la lampadinä . I bei fórmécc zalcc coi papaèr rós co 'nturen al celèst dei fiurdalìs, searai fórse negàcc en de quàc pós ? Pöl dàs magaré che i siès an paradis . E i mur ? Ghìä töcc i cios co i sò filaré dricc a du per du miticc apostä sö dögai e fòs : svanìcc, e s'è slargat i furmintù . E chél ghibù che za ai prim de Utuèr el stassiunàä fin quasi a primäerä, e brinä e calabrosä de s'ciopà i ruèr ; searai fórse biöscàcc en font a l'érä ? Le bòse, i verù e i sanguanì, i gamber e le lömaghé de 'na óltä sanguète, bissécagné e scarpulì, endó ei nàcc a fa i sò öf e i nì ? E l'aquä che piüìä tàcc dé dré a filä e po' la deéntàä néf a metà Noèmber, 'ndó elä 'ndadä, chi el che öl scundilä, col giàs e le biöscarölé de Desembèr ? Endó sarai finìcc i s'cipì sö le mà e sö i calcàgn che ghìé quant séré picinì e vedé pö da 'n sac de àgn ? E quant che se zügàä al cét de èrgót con de 'na scàä de predä o 'l scuriadì, e 'l ciancol l'erä 'l "golf" dei poarècc, e i zuègn i ghìä rispet per chèi pö ècc .
Post n°30 pubblicato il 09 Gennaio 2008 da diadetti
Da désember ghè 'na passerä negrä ché la vé a rügam la tèrä an de i vas, e mé só pö cosè stüdià söl mé pozöl per fa che la la 'mpiènté lé e la scapé vià. Ma só mitit a fa le bandieriné e mé moér sö 'nde 'na stròpä la gà 'nfilsat on bicér de chèi de plasticä biancä che 'l sa möf con de on fil de ariä e quant el piöf ghe ciocä 'nsimä l'àquä, sperom issé che lé la scapé vià e la la 'mpienté lé de vegnèr che a rügà, raspà e becà, an de i mé vas, tanto che, per nó sbaglià, góm preparat le brisé de pa 'nde on cabaré e sóm stàcc lé a spetà che la turnaès andré per vedèr se la nàä söi vas per fa despèt... e 'nvécé l'è riadä al vul con de on sbessèt, l'è nadä 'nsimä 'l vas a römà la terä, amó, entat che 'l sbéssèt el s'è 'nfilsat col có diretament 'nde le brisé de pa del cabaré sotä 'l nas de dré dei védré de mé moér e mé.
|
Inviato da: diletta.castelli
il 11/10/2016 alle 15:39
Inviato da: topsienne
il 11/06/2012 alle 18:31
Inviato da: diadetti
il 29/09/2011 alle 18:49
Inviato da: diadetti
il 03/02/2008 alle 22:40
Inviato da: topsienne
il 01/02/2008 alle 10:14