anima

‘O SAPUTO

Io cumpatisco sempe a ‘na perzona,

ca quanno fa ‘na critica è tagliente,

o resta friddo e fa l’indifferente

pe’ fa’ vedé ca niente ‘o ‘mpressiona.

Comme po’ di’ ca ‘a cosa ‘e n’ato è bbona,

chi spisso stenta ‘a vita amaramente?

Sta ‘ntussecato, finge ‘nnanze a’ ggente,

ma, appena ‘o danno corda, se “sbuttona”.

E allora se capisce ca scantona,

e caccia ‘a fore tutt”o malamente;

e fa ‘o saputo, ‘o dotto, ‘o cumpetente,

ca te ‘mbriaca ‘e chiacchiere, te stona;

e quanno a ddi’ ‘mpruperie s’abbandona,

te dice ‘o fatto sujo, comme s”o sente.

Ma, si ce sta ‘a vantà, sinceramente,

è l’unica campana ca nun sona.

Si sape ca tu si’, nun se n’addona,

e si nun si, t’accide maggiormente.

Intanto, tutt”o juorno, nun fa niente

e, si fatiche tu, nun te perdona.

Raffaele Viviani