__________

u tempu longu

A sittant'anni e doppu
mentri cala u sipariu
e accurza a vista,
l'omu leggi 2 Nuvembri
nto calannariu di l'occhi.

Ma stamatina,
senza grazia accanzata,
io leggiu Pasqua e risurrezioni;
e viu davanti a mia
u tempu longu,
i strati aperti,
u celu nettu
e senza trona chi scàttanu.

E diri ca c'è a guerra,
a caristia,
e populi pronti a scannarisi.

E diri c'haiu a carni scurciata,
i pedi spinati,
e u cori
chi si jinchi e svacanta ogni ghiornu;
e c'haiu vogghia d'erba
e di pani càudu
e di vucchi e d'occhi chi vàgnanu
e scippanu i siccumi du cori.

D'unni veni sta luci
ca m'illumina l'occhi
e mi fa vìdiri u lustru nto scuru,
u celu nte funnali
e a gioia lùciri nte lacrimi?

Cu sfardò i negghi
ca chiòvinu sangu
e mi fa vìdiri u munnu rinasciri,
a terra allungarisi,
e u celu gràpirisi
e tràsiri nta àutri celi?

Cu mi fa vìdiri
i muntagni vivi,
l'arbuli additta
e u suli ca i vesti
e u ventu c'arrimina e ci parra?

Non è a puisia;
a puisia adduma e s'astuta,
affunna nterra e mori,
acchiana ncelu e cadi:
havi l'ali di pagghia.

Zocch'è e pirchì,
guardu a campagna e ciurisci cu mia,
guardu u mari e mi pari u me lettu,
guardu u celu e ci trasu cu cori?

Zocch'è e pirchì
io sugnu sulu
e viu genti e banneri
e òmini d'ogni lingua
e mi sentu carni ncurpurata
e ciumi nte ciumira?

Zocch'è e pirchì
mi sentu natura
chi mori e rinasci
ed haiu i carni tènniri?...

Stamatina addivintavu omu.

(Ignazio Buttitta)

Grazie ad Angela,
il cui impulso meridionalista, fonte di tante tensioni tra noi, ha saputo regalarmi questa perla... senza frontiere.
La tentazione di postare quel "pezzo" in particolare c'è stata ma è subito svanita, conscio del fatto che la poesia sia un pensiero compiuto, comprensibile solo nella sua interezza, che non può appartenerci a tratti.
Della serie: "NO comprendi NO party" ;)