occhiodivolpe

canzuncella

Cu' st' uocchie blu maré ,
'sti pantalune stritte ,
rerènno cu' 'e ccumpagne
gire e t' avuote a ccà ...
Te ggire 'a parta mia ,
pare me vaje cercanno ,
e bballe 'o tinghi tango ,
sì , pe' tte fa' guardà ...

r. Me guarde , che guarde a ffa' ,
io ggiro attuorno pe' te scanzà ...
me guarde , che vuò sapé ?
Io nun te penzo , nun penzo a tte ...

Jesce , e pe' tutte parte
te trovo 'nnanze a mmé ,
po' pe' mme fa' dispietto
avuote 'e spalle a mmé .
Si saglio 'e scale scinne ,
pare che guarde 'ncielo ,
e ccante 'na canzone
pe' ffà dispietto a mmé .

r. Me guarde , che guarde a ffa' ,
io ggiro attuorno pe' te scanzà ...
me guarde , che vuò sapé ?
Io nun te penzo , nun penzo a tte ...

Ma po' ce stanno 'e vvòte
ca staje cu' ll uocchie triste ,
e seria e appecundruta
pare ca sì perduta .
Tanno nun sì cchiù guappa ,
me pare 'na criatura ,
pare ca dinto 'o core
tiene 'na malatia ...

r. Me guarde , io guardo a tté ,
e m' 'e purtato addò vuo' tu ,
te guardo , che t aggia dì ,
vieneme 'mbraccio , fatte vasà ...