occhiodivolpe

'o pulmānn

quanno 'e vvòte 'e tiempe mieie
te pigliave 'nu pulmànn ?
tu trasìve e all intrasatto
te truvave int 'o teatrino ..

chillo allerta a chillo 'e sotto
assettato cu'  'o ggiornale :
- premmettete ? sto liggènno
nun vutate ancora 'a paggina -

- io stò jenno 'o cardarelli
tengo a sòrema allettata -
- jette ajère , che cainàtema
ll è venuta 'o svenimento -

- jate annanze ca c è pposto
nun ce 'a faccio a riciatà -
- ma 'sta porta nun se chiure ?
ccà ce stammo a cungelà -

- giuvinò fermo ch 'e mmane -
- m hanno spinto .. ve chiammate ? -
- Pinto Rosa .. ma pecché ? -
- pe' sapé ... si caso maje .. -

- l aggio visto a materdei
ca passiàva sulo sulo ... -
-  ah pecché ? nun 'o ssapite ?
mo sta a spasso ch è falluto -

- si vulìte risparmià
cu' 'na polizza mensile
ne tenesse una p' 'e mmane
ve putesse favurì ... -

accussì pe' tutto 'o viaggio
era 'na cunversazziòne ,
ogneduno a tuttequante
steva a sèntere e pparlava ...

 siènte mo che cosa strana :
- uè cummà , che stanno a lutto ?
tutte zitte a capa sotto .. -
- zitta , stanno a diggità -