SICILIA ANTICA

MUSULINU E L'AUTARCHIA

                                       MUSULINU E L'AUTARCHIA

Quannu Musulinu acchianau a lu putiri di l'Italia, misi tanti liggi, chi a li so amici ci parsiru boni e a li so nemici ci parsiru tinti.

Detti ordini a tutti li cristiani di darisi lu vui (voi), quannu parlavanu ntra d’iddi.

A li viddani ci fici mettiri furmentu, pi fari saziari li genti picchì c’era fami  e ricinu, pi lavari lu stommacu a cu avia la lingua longa.

All’urtimu, mmintau 'na parola biddissima "autarchia", chi parola era e parola arristau, picchì nuddu sapia soccu vinia a diri.

Sta parola Musulinu la fici canusciri a tutti chiddi chi avianu putiri di cumannu, speciarmenti a li gerarchi e a li potestà .

‘Nta un paisi di campagna scurdatu puru di la sorti, dunni la genti era tutta arfabbeta, scarsa e spidduzziata, arrivau puru l'ordini di Musulinu di fari "autarchia" asinnò c'eranu peni pesanti puru pi li capuriuna di lu partitu.

Lu potestà, ch’avia lu cucciteddu di la littra giustu giustu, nun si facia pirsuasu soccu vinia a diri 'sta parola e nun sapia chi pisci pigghiari pi fari rispittari l'ordini ricivutu.

A li voti iddu passava urati sani misu  pinzurusu  pi circari d’asciogghiri st’agghiommaru, chi si lu sintìa comu un cutugnu nta lu stommacu: -

“ 'Sta vota nun si tratta di fari viviri lu solitu bocali d’ogghiu di ricinu a chiddi chi nun vonnu rispittari la liggi! Sta vota c’è un ordini chi parla  chiaru comu lu suli di mezziornu: "fari rispittari l'autarchia e fari cunsumari prodotti autarchici", ma santu diavuluni, dunni li vaiu a truvari tutti sti prodotti autarchici ch’annu abbastari pi tuttu lu paisi? Ma armenu sapissi soccu sunnu? Po essiri chi Musulinu li manna p'attuppari la fami a li me paisana? Iddi  cunsumanu sulu panuzzu e pasticedda,  quannu li ponnu accattari”-

Lu potestà si scantava chi 'sta vota l'ogghiu di ricinu tuccava a iddu s'un si firava a spirugghiari 'st'agghiommaru, perciò un  jornu la pinzà bona di iri a Roma a parlari personarmenti cu Sua Ccellenza Benitu Musulinu pi farisi spiegari, pani pani, vinu vinu, comu ìanu li cosi.

A Roma pi essiri ricivutu di Musulinu, puru si iddu era un pezzu rossu di lu partitu a lu so paisi, cci vosiru tri jiorna; e da 'stu tempu si ripassava chiddu chi ci avia a dumannari, accussì 'un avissi fattu mala fiura; a la matina di lu terzu iornu, finarmenti fu ricivutu.

Doppu chi si salutaru cu lu vrazzu aisatu, Musulinu accuminciau subitu a parlari di partitu, di patria, di eroi, di 'mperu, di guerra, di gloria e via discurrennu; quannu si firmau di parlari, finarmenti lu potestà cci potti fari li so dumanni chi ormai l'avia frarici 'n testa.

Musulinu allura accuminciau arrera a parlari, 'sta vota d'economia, di balanza di pagamenti, di attivi e passivi e di autri cosi assai  'mportanti; lu potestà stava attintannu cu la vucca aperta pi li beddi paroli ma era cchiù cunfusu chi pirsuasu e nta la so testa maliricia l’ura e lu mumentu chi pinzau di veniri a Roma.

Musulinu a un certu puntu s'addunau ch'avia parlatu mmacanti e allura lu fici affacciari a lu finistruni e cci rissi:-

"Ora ti fazzu 'n esempiu accussì lu capisci megghiu: la viri ssa matamobili passari?"

"Ora si", arrispunniu subitu lu potestà;

"troppu bonu" ci abbattiu Musulinu,

- "Quannu li roti, lu motori, la carrozzeria, e tuttu lu restu su fatti nta l'Italia, 'sti pezzi s'hannu a chiamari prodotti autarchici, e quannu tutti avemu 'na matamobili comu e chissa, allura chissa è  l'autarchia. Ti fazzu ora n'autru esempiu: la viri dda bedda signura cu so maritu, chi stannu passannu di cca sutta comu su vistuti boni?  Quannu li scarpi, li quasetti, li vistita e tuttu chiddu ch’annu di ‘ncoddu, puru lu bastoncinu pi passiari,  sunnu fatti nta l'Italia e tutti semu vistuti comu e iddi, tutti ssi robbi s'hannu a chiamari prodotti autarchici, e finarmenti avemu l'autarchia. 'U vo fattu n'autru esempiu?"

"Nonsi" rispunniu siccu lu potestà p'un farisi diri ch'avia la testa dura "ora capivi soccu veni a diri, Voscenza m'avi a scusari si Lu vinni a nociri, Lu ringraziu: Voscenza è sempri lu me patruni; ora mi nni vaiu, Voscenza benerica."

Dicennu chistu, sciu di lu palazzu e ancora curri pi la stazioni dunni cu lu primu trenu partiu pi lu paisi.

Duranti lu viaggiu si priparava chiddu ch’avia a diri a lu paisi, e circava di pinzari a tutti li paroli allittrati chi avia ntisu di lu stessu Duci, pi fariccilli  trasiri nta lu discursu e fari bedda fiura.

 Arrivatu a lu paisi, a la stazioni nova, ch'avia fattu fari Musulinu, c'eranu tutti l'autorità chi l'aspittavanu, sia  pi rispettu, chi pi sentiri soccu avia cunchiurutu cu la so iuta a Roma.

Iddu fici la persona 'mpurtanti chi vinia di la capitali cu notizii frischi frischi e, nun vulennusi sbuttunari subitu pi darisi 'mpurtanza, puntau un'urienza straurdinaria a lu Comuni pi la mezza.

A lu Comuni, fici un discursuni parlannu di patria, di 'mperu, di gloria, d'economia, di balanza,  'nfilannucci tutti li paroli tischi - toschi chi pinzava d'aviri 'ntisu di Musulinu ma, a lu sucu di lu discursu, nun putia spiegari chiddu chi iddu stessu 'un avia caputu, perciò fici comu lu Duci, s'affacciau a lu finistruni e dissi:-

"Siccomu d'economia 'un ni capiti nenti, ora vi fazzu 'n esempiu 

chi vi fa capiri tutti cosi".

Ma...taliannu nta lu chianu nun c'era nudda matamobili chi passava, picchì nuddu 'n ta lu paisi si la putia accattari, e mancu passavanu genti vistuti boni, picchì livannucci  tutti chiddi chi avianu la divisa nivura cu lu pinnacchiu 'n testa, e li carrubbineri, tutti l'autri avianu li vistita arripizzati e assai caminavanu a peri 'nterra.

C'era sulu un puvureddu assittatu nta lu marciaperi, tuttu spidduzziatu, cu lu vastuni mmezzu li ammi, chi si stava quariannu a lu suli. Doppu c’era Turi lu stagnataru, chi giustu giustu stava passannu  cu lu carritteddu tiratu d'un sciccareddu cagliarisi; supra lu carritteddu ci avia li stigghi pi travagghiari e quattru quarari di ramu ch’avia a stagnari, e gjia abbanniannu: -" Cunzamu e stagnamu!"

Lu putistà nun putennu cchiù firmari lu discursu accuminciatu e fari lu trunzu di la mala fiura, continuau lu stessu a parlari:

-"Lu viriti ssu carrettu? Quannu li roti, la casciata, l'asti, li stampaneddi e tuttu lu restu su fatti nta l'Italia, chissi s'hannu a chiamari prodotti autarchici.

Continuannu soru soru lu discursu, pirsuasu di fari pi comu fici Musulinu, ci abbattiu:

-" 'U viriti ss'omu assittatu 'nta lu marciaperi? Benissimu, quannu la coppula, lu vistitu, lu bastoncinu di passeggiu, li scarpi (veramenti ddu mischinu era a peri 'nterra ma siccomu Musulinu parlau puru di scarpi, iddu cci li fici trasiri nta lu discursu) e tuttu chiddu ch'avi di 'n coddu vennu fatti 'nta l'Italia, chisti s'hannu a chiamari prodotti autarchici, e quannu tutti semu vistuti comu e iddu,e pussiremu un carrettu comu e chissu, allura avemu fattu la vera autarchia. Chistu dissi Musulinu."

     VITO MARINO