Mamma prega sempre per noi

Partisi Minicu 'mbasciaturi di Maria... Accussì accuminciava lu rusariu di mè nanna, ca poi 'un'era sulu so stu rusario ca a idda libbirava l'arma e a nuautri carusi maciddiava la vita. Aviti a sapiri, ca sta divuzioni accuminciava alli sei, prima di scurari, quannu 'n addevu l'ucchiuzzi si li senti chjuri, havi la testa modda comu lu quagliu e li gammuzzi stanchi, pi li cursi 'nni lu bagliu. Ma idda ...nenti ! 'Ncapu la so'siggitedda tisa tisa, rrummuliava cu la cruna mmanu: 'N'avi Maria pi mè cummari Tresa, un Patrinostro pi lu zzu' Tanu,    requimaterna pi li mè morti e l'ajutu di Diu a cu' 'un havi sorti. Sant'Antoniu abbati, t'arraccumannu li mè frati, san Giuvanni, tenimi arrassu li malanni, patri Jachinu La Lumia, pruteggi la vita mia, san Calojru di Naru, ca di grazzii ni fa un cantàru ammargiami di sordi, ca la mè casa nun si perdi... E accussì pi uri e uri, idda cu lu so parriniari e li litanii a li santuzzi e nuautri 'gnunjati dda comu armaluzzi. E mai 'na vota c'avissi dittu 'ntra tantu ciarmuliari, 'nni tuttu stu prigari, pi amuri o pi dilettu pi sbagliu o pi duviri: Signuri, pi favuri, pruteggi sti criaturi!