L’amara storia ‘i Cicciu – V – Lu gabbu di la genti

“ Viditi la fortuna? ‘Nd’have au chjanu
figghj di mamma chi cercanu maritu!
‘Nc’era bisognu mu vace luntanu?
Quandu lu seppe fìgghjama, ca è zzitu,
‘nci catte lu ragamu di la manu,
perdìu la vuci ‘nsiemi au culuritu.
Vui sapiti ca fìgghjama, a Milanu,
rifiutau, pe’ Cicciu, nu partitu

chi non vi dicu. Ma la sorta gira
tutta cecata, e non guarda a bellizza;
non bada a dota, a curredu né a lira.
L’amuri novu u tira da capizza:
‘nci mise nu parocchj assai di vagghja,
e Cicciu cride all’erba, e inveci è pagghja!