L’amara storia ‘ Cicciu. – II –

Ma tu, divina Musa, dimmi, è veru
ca bella e ricca e di modi gentili
era la donna? O sulu lu pensieru
di Cicciu, lavurandu ‘n grande stili,
la rendìa tale? Sciogghj lu misteru!
O Musa, forsi è giustu, tu li fili
mai di la trama mustri per interu.
La donna ‘i Cicciu, certu, non è vili:

‘nc’è cu bella la giudica e avvenenti,
‘nc’è cu dice ca è stràbica e tartaglia,
cu dice : “è ricca” e cu: “ non have nenti”.
Pe’ Cicciu basta l’arti di la maglia.
Ccussì, a jennarju, cu viscati e riti,
catturanu li spinzia li Cianiti!