I favolosi Anni 80 – X –
Mastru Cola era barbieri,
e sfregiava li clienti:
diventatu mo ‘nfermieri,
canizzija li morienti.
Non cuntentu, la mugghjeri
arrescìu pemmu la menti
pe’ maestra a la materna:
risultatu? Mo, d’estati,
villa a mare; di poi sverna,
cu li ricchi fortunati,
‘nta la Sila di Taverna.
Spisi franchi hannu li figghj
( ‘nci li passa tutti i Statu):
tu chi voj? Pecchì non pigghj
zzo chi trovi abbandunatu?
Ma…’nci vole vocazioni
pe’ certi cumbinazioni!

I favolosi Anni 80 – XI –

Sonaturi di violinu,
cantastori , né poeta
mai non vitte nu carrinu,
mai la cena eppe cumpreta.
Ma Ramundu Sperciulinu,
chi have bona la cometa,
a rresciutu ‘u manda ai stampi
centu versi ciunchi e storti,
fice focu, troni e lampi,
disturbau li vivi e i morti,
‘nchjanau milli e centu rampi,
bottijau a portuni e a porti.
‘Ndi pigghjau pedati ‘n basciu!
Ma, a la fini, la Regioni
s’accattau l’oper ‘n fasciu
e ‘nda fice donazioni
pemmu serve a munizioni
di’ scolari, o mu si ‘ntoppa
‘ncuna càttedra ch’è zzoppa!

I favolosi Anni 80 – XII –

A li vacambundi penza,
dicìa u ‘Nticu cu ragiuni,
la divina providenza
sette voti u jornu, e cchjuni.
Era Biasi sulu e senza
arti né parti; ed avìa
cchjù vizzi ca pili ‘n testa.
Mentre Biasi a caccia jìa,
na tagghjola juntau lesta.
Non ‘nci fice male assai:
l’azzoppau discretamenti.
Poi sciurtìu ( Voi pemmu sai?)
ca eppe Biasi nu ‘ncidenti,
mentre jìa pe’ putaturi
a la vigna ‘i mastru Turi:
e , vicinu alli elezioni,
Biasi ottinne la pinzioni!

I favolosi Anni 80 – XIII –

Micaredhu è nu ‘nnocenti:
cride u mundu talli e quali.
Approntati i documenti
e pigghjatu lu postali,
jìa na pratica mu sbriga
non ricordu a quale ufficiu.
Cchjù di n’ura eppe mu briga,
cu pacienza e sacrificiu,
pemmu trova ‘a porta giusta.
Poi a nu Cèrberu ‘ncagnatu,
chi stacìa mu si lu gusta,
cercau ajutu, scoraggiatu.
Fu mandatu di Pilatu
ad Erodi centu voti;
quandu, ‘n fini, cchjù non poti,
lu misteru fu svelatu:
“ Frate, ccà, quandu tu chjedi,
senza santu protetturi,
ha’ mu bussi cu li piedi!
Non ricive senza hjuri
Catanzaru, né Cusenza;
ed a Riggiu, ti scunsigghju
mu vai sulu o mu vai senza
di na pècura lu figghju!”

I favolosi Anni 80 – Finali (Corali).

Coro : Ma l’esempi su’ ‘nfiniti,
perciò basta cui ritratti.
Corego : E la curpa a cui criditi
ca va data di sti fatti?
Coro : A lu Pantraloni pubblicu,
chi have occhj, ricchj e testa,
e non hjata ( dogghjacòlica!),
e non suscita tempesta!
I semicoro: Terremotu cu lu sterzu
‘nci vorrìa…
II Semicoro: E guida cui?
I Semicoro Fra mia e ttìa, nudhu di’ dui.
II Semicoro : ‘Nci lu damu a ‘ncunu terzu?
Corego : ‘Nsiamaddìo! Cà si sbuluna,
ti cumbina nu pezziju!
Io non vogghju ‘u tornu ‘u viju
cumandare na perzuna.
Megghju milli tundituri
ca nu sulu scorciaturi!
Coro : Ed, allura, tenitìli
sti mangianti d’ogni sorta,
cà la lagna chi tu fili / è na cosa nata morta!

Nobili razza pregiata

Tu nobili ti dici, ‘i sangu anticu
non maculatu, di razza normanna,
chi, èrrama, cca trovò stabili pricu.
Si ‘nsisti, criju: tu si’ sulu panna.
Standu a la brogna, ai hjanchi, a lu vidhicu,
all’occhj, ai ricchj, au frunti menza canna,
si proppapputa fu Ruggeru o Erricu,
non saparìa: ma forzi la pronnanna

tua discindìa di la pregiata razza.
Non parru chjaru? E pozzu stare quetu?
Nobili, tu?…A certa carcarazza,
chi si vantava d’aquilinu cetu,
nu spinzia nc’isse: “Tu, si voi, starnazza,
ma arrassu ‘i cca, cà non sumportu u fetu!”.

Micu – I –

“ Ti senti male, allura, Micu, assai?”-
“ O Rosa mia, haju ‘na carcara!”-
“ Non veni vasciu?” – “ Mannaja li guai!
“Tu non mi cridi? Oh, sorte mia amara!”-
“ Non voi u veni? Io vaju; è tardu ormai” –
Non avìa Rosa arrivatu a’ hjumara,
ca Micu s’aza e canta: – “ O Rosa, vai!”-
Apre u casciuni, sciogghje ‘a ligara

da’ cirma duve tènenu ‘a suriaca,
‘nda linchjie nu stuppedhu, e curre lestu
alla cantina. – “ Cummare, divaca,
e pagami nu prezzu prontu e onestu!”-
E ‘mbive e mangia, e canticchja , e si ‘mbriaca.
‘Nchjana la frevi a sira. –“ Oh, Rosa, prestu!”-

Micu – II –

“Mugghjeri snaturata, oh, assassina!
Ajutu, genti!” – Chistu sente Rosa,
tornata ‘n casa. E si sentìa, mischina,
‘n tortu, cu lu rimorsu di la sposa
chi abbandunau u maritu ‘nta la chjna;
e già dicìa: “perdunu”, quando posa
‘n terra l’occhj, (“ e sti coccia?”)…ed indovina.
Apre u casciuni e accerta; ma la cosa

cchjù si palisa pe’ la puzza ‘i vinu.
Pigghja Rosa ‘a forcedha, ‘i sutt’ au lettu:
“Mo dimmi tu, duve haju mu ti minu!”
E mina e ‘ntoppa, cu furia e dispettu;
ma Micu, fra l’ovatta e lu coscinu,
non si ciunca, ma grida: “Catalettu!”

Micu – III –
Finarmente, si sente sdillassata,
pe’ la jornata e pe’ li botti dati;
jetta ‘a forcedha Rosa, e: “Oh sventurata!
Chi mi serve, a mmìa, ‘a vita? Animi ‘mbiati,
nd’have vèduvi ‘n giru; e io, ligata
cu stu nèspulu!… Oh, Micu, non righjati?
Micu, rispundi! Micu mio!… Oh, sirata!
Oh, focu, l’ammazzai di forcedhati!”

Lize u lenzolu, e vide ‘a facci gialla
di Micu, senza vita…”Forzi svinni.
Mo provu cu l’acitu… O Micu, falla
sta grazzia a Rosa tua!”- Micu rinvinni
mentre l’acitu nci culava a galla.
“Oh, lu spiritu mio ripigghja pinni!

E non sprecare il vino, o Rosa sciocca:
non sotto il naso; versamelo in bocca!”

Mastru Vastianu.

Quasi guardianu au cimiteru anticu,
‘nc’è lu ritrattu tuo, mastru Vastianu:
pari nu patriarca e guardi amicu
cu trase e cu nesce, ancora vivu e sanu,
e cu’ vene mu trova ùrtimu pricu,
portatu di vicinu o di luntanu.
Ti ricordu, sedutu ‘nta lu vicu,
comu nu Garibardi stancu e stranu;

o quandu, a Fossa, doppu lu lavuru
(facivi i ceramidi ‘i terra cotta),
vampulijavi, già tra lumi e scuru,
li castagni ‘ntaccati, senza botta.
Mo tu riposi ‘n Dio, e si’ au sicuru:
si voi, prega pe’ nui, prima m’annotta.