‘U figghju attori.

-“Ha’ tu mu vidi, a Pasca, chi figura
‘ndi face fare figghjuta! Tri misi
ha chi non vene au scaru mu lavura,
ca va alli provi. Di impegnu si misi!
E’ ‘na cummedia, e ‘nci voli bravura:
e bravi ‘nd’have pochi a stu pajisi!”-
E notte e jornu si insònnanu l’ura
e patre e mamma, speranzusi e tisi.

E l’ura vinne, e si laprìu la scena.
Primu, secundu, terzu, e lu quartu attu…
Nenti…Prica, virgogna, arraggia e pena,
cà già finìa lu quintu. – Ed, a ‘nu trattu,
ècculu, cu ‘nu palu , e dice appena:
“ Fissato è il palo!”; e nesce guattu guattu.

Si scindi ‘i Prastu

Fèrmati e guarda, e, ricriatu, vidi,
foresta e prati e, di li casi spranti,
fili di fumu sup’ ai ceramidi;
e, luntanu, lu mare chi, davanti,
t’ammuccia u Poru; e ( veramente , o cridi?)
l’ìsuli, la Sicilia e lu giganti
chi sgorgia focu; e li cchjù certi lidi
duve s’ appacia Mèsima, l’erranti

fra arangi e olivi, e duve lu misteru
dorme di Medma.- E forsi ‘ì ccà san Brunu
scrutava ‘n basciu si venìa Ruggeru,
bramanti regnu e sperandu perdunu
e lumi a guerra di cori e pensieru.
-“Vani affanni, gran Conti: porro unum!…

Chi ti ‘nda fai s’acquisti mare e terra,
e perdi l’anima tua?… Oh, sti munti,
chi tu trapassi di Militu a Serra,
‘nda vìtteru arbi , e meriji, e tramunti!”-

Cumpare Cicciu.

Era, cumpare Cicciu,longu e stortu
comu ‘nu pedi amaru d’olivara;
‘u codhu ‘i hjancu, ‘u culuritu smortu,
‘n’ occhju a la gozza, l’atru a la cortara,
(però la mira sua jìa sempe ‘n portu ),
li pedi, pali di ficandianara,
li vrazza non volènu scala all’ortu
quandu cogghjènu ‘u cezu o ‘a cerasara.
Quarcunu lu dicìa duci di sali,
ma quandu vindìa l’ogghju o la rosia,
pisu, misuri e cunti eranu tali,
chi restava gabbatu cu cridìa
ca gabba ad idhu. Poi di ‘nu vocali
inchjìa ciufreca, e dicìa: “ Marvasìa!”.

Poeta

T u ti dici poeta, e si’ sicuru
ca si’ poeta, e tiri alla diritta,
l’occhi spirdati, ‘nta la facci scuru,
la destra chi ti pende, ‘ i l’atra stritta,
arredu ai reni.- Sdunijare è duru!
Talija la visera da berritta
si mai spari n’abbattaru a lu muru
mu appicci finarmente chissa affritta

pippa , chi di la vucca mai ti manca.
La musa, appressu a li fantasmi belli,
ti ‘ncama, ti ‘ncacchjola e affanna e stanca.
La botta, quandu cogghje li stornelli,
‘nda còtula, ‘nda fere, e u sbardu sbranca:
la ciaramida chjumba di li stelli.

‘A Novina.

Fra lumi e scuru, ‘a missa cominciava.
Tràntuli ‘i friddu; poi suspiri e vuci
di chjantu, quandu l’Ostia si elevava;
bàttiti ìi pettu e signi di la cruci.
Divotamente a longu si adurava.
-“Rorate, coeli”-, doppu ‘a missa, duci,
nu coru d’angeli, chjaru, ‘ntonava.
Comu cu brama, di l’abissu, luci,

-“Ne irascaris “-, di frunti, i canturi
pregavanu pietà pe’ l’infilici
terra in attisa di lu Sarvaturi.
-“Allestìtivi”, ‘n fini, “cari amici…”
hjurìa l’anticu cànticu d’amuri.
E l’arba hjanchijava a li pendici.

Natali ‘i ‘na vota.

Era – Natali -, all’épuca ‘i ‘na vota,
‘na gioja grande, a longu disijata;
e quandu si ‘nda jìa, dassava sbota
l’anima, ca tornava prichijata
la vita d’ogni jornu. – Quandu ‘a rota
di lu trappitu all’acqua ‘ncannalata
cuminciava mu gira, già la nota
di li campani, ‘a sira, era cangiata.

Cuminciava l’attisa.- Sant’Andria,
san Nicola, Maria, Tumasi canta:
vigilia!- ‘N chjesa sprenduri, armonia:
‘u presepiu, ‘u Bambinu! Oh, notte santa!
oh, canti antichi! oh, incenzu chi svania!
Tornandu a vui, l’anima mia si ‘ncanta!

Alla cantina.
Cciccu ‘nvitau a ‘Ntoni alla cantina:
-“ Io mentu lu mangiare, e tu lu vinu!”-
Nu piattu di suriaca tabacchina
mise ‘n tavula, e disse: -“Sciala, Ninu!
Pigghjati ‘a brocca: a mmia la cucchjarina!”-
Ed attaccau mu cogghje tantu ‘n chjnu
chi ‘Ntoni arresciu ‘u pigghja ‘na decina
di coccia ‘n tuttu; e finìu lu festinu.

Appressu sira , ‘Ntoni, cu nu piattu
di bucatini, disse:- “O Cciccu, tocca
a mmia stasira; e rispettamu u pattu:
la cucchjarina a ttia, a mmia la brocca!”-
E ‘ntorchjo’ tuttu; e Cciccu, a mussu ‘ntattu,
parìa a cu’ brama, ma non chjca ‘a schjocca.