E tornanu a cantare i tri campani
tundi, suavi, vucchi d’armonia,
comu cantavanu ai tempi luntani,
quandu davanti ai casi non criscìa
ancora l’erba; quandu di cristiani
‘a chjesa, ‘a strata, ‘a chjazza si linchìa,
o pe’ festa o pe’ luttu.-  No, non vani
‘ndi tornanu ricordi o nostalgia:

non potìemu restare; ccà non c’era
lustru pe’ nui; non pane, non lavuru.
Eppuru, santu Roccu, ‘na minera
di ricchizza sarìa sta terra, eppuru…
Nui domane partimu. – Addio chimera!
Oh, campani, sonati; si fa scuru!