PRESICCESI NEL MONDO

LI MEDICI SANTI

LI MEDICI SANTI

Dialogo telefonico tra due vecchietti

A - (telefona a B) Prontu?

B – Ehi tie sinti? Cci sta faci, ah?
A – E ci aggiu ffare, sta me ndrafiscu e fazza Diu!
B – Percé ai faticatu mutu e si straccatu?
A – Su straccatu, su straccatu cu sto chiusu ntra ccasa, cu sto tuttu lu santu giurnu senza cu fazzu nenti. Li primi chiempi aggiu trapulisciatu nu picca: aggiu cunzatu lu limmu ca s'ìa scasciatu, aggiu misu l'oju a li cancaretti de la porta de casa ca scamava e mute avetre scerculeddhe. Nsomma cose ca unu ntrassa pe tantu e poi, quannu se minte, ntra na menza sciurnata face tuttu. E tie?
B – Ista è l'arte ca n'è rrimasta de fare. Cci boncifaci. Li primi chiempi, puru pe mie, su passati squariannu de quai e de dhai, ma moi, me rattu! Certu ca poi, quannu sentu ca tanti vecchiareddhi comu tie se ne vannu cu fannu terra pe ciciri, rrimagnu fiaccu!
A – Lu vecchiareddhu ca sinti, fessa! Nu te scurdare ca teni do' misi cchiui de mie, e ttocca prima a tie e fazza Diu!
B – Pocca na! Ci sape, beddhu meu, comu si curciuleddhu, me sape tantu ca sta minti li denti de latte! Lu curuna nu barda filu lu mese de cchiui o de menu. Ci t'ane zziccare, te zicca e nu bane a la Cumune cu bide ci pe ci sa si natu prima o dopu quarcun'avutru. 
A – Ai ntisu ca stu curuna se n'è scisu puru a quassuttannui? E quanti ristiani sta se ne fuscene ncora de l'artitalia e sta cu se ne vennu quassutta? Me crisciu ca ntra tanti ci sape quanti nci ne suntu già nfettati e nnucene la malatia a nui, ci l'a criati! S'erene pututi rrimanire a dhai, dhi fessi? None e fazza Diu!
B – Su carusi ca stavene suli a dhe vanne. Moi, cu le scole e le frabbiche chiuse, cci ponnu fare, pareddhi! Ci pe ci sa li zzicca la nfezione, comu fannu cu tirene nnanzi, suli a dha mmenzu?
A – Llora, sacunnu tie, è meju cu se n'eggene scisi cquai? Ai visti li treni chini chini de gente ca, pe la fuddha, annu piatu lu primu trenu c'annu truvatu? E te menzi tie, ca ntra tanti nu nci suntu chiri malati ca ne nfettene puru a nui? Nunn'era statu meju cu se ne stannu a dhai senza cu bennu cu nzurtene la mazza a quannui?
B – Visciu ca, comu ommu de chesia, teni sempre a mente le cose de Diu! Me crisciu però ca te rrivene sulu a ncapu e a dhai rrimannu! A dhu stane l'amore de lu Signore, ca predichi predichi e nu lu minti mai a mpratica? Menumale ca nu se pote ssire de casa, ca si no ci sape comu te minavi cu dai na manu a ci tene bisognu!
A – Ca se nu se pote ssire. Puru fijama lu prevete, cci pote fare? Stane sulu e nu dice mancu Missa.
B – Sarà ca cchiui cchiui de la Missa, li manchene li spunzali e li catafarchi ca su chiri ca portene li sordi a mposcia. Moi ci pe ci sa unu more, a fijata nu li trase nenzi, tantu basta na croce d'acqua santa su lu chiavutu e ci s'a vistu s'a vistu.
A – Me pare a mie ca nu se pote fare avutru! Ttocca cu ringraziamu Diu ci ne scampa de stu malannu e fazza Diu!
B – Nunn'è meju cu ringraziamu tutti dhi santi ristiani ca sta fannu miraculi cu ne mintene a condizioni cu tiramu nnanzi comu meju se pote?
A – Eccu, teni raggione, nci vole propiu nu miraculu! Comu chiru ca fice San Carlu all'acquarisi quannu li libberò de la peste.
B – Sarà ca è meju ci lu miraculu lu ddimannamu a li medici santi, nu a li Santi Medici Cosimi e Damiani, ma a chiri ca fatichene notte e giurnu cu sarvene li cchiu muti ristiani ca ponnu, ntra tanti sacrifiggi e cu li picca strumenti ca tennu. Tutti dhi santi ommini, ca puru ca nu su Santi, iddhi, sta fannu li veri miraculi.
A – Deveru! Sta se mmurtalene de veru! Però nci vulia puru quarche Santu veru de lu Paradisu e fazza Diu!
B - Nui ne llamentamu ca nu tanimu nenzi de fare, ca nu putimu ssire de casa, ca nu putimu scire cu ne pijamu lu cafè a lu barra, ca nu ne putimu fare lu tressette cu li cumpagni! Ttuccava, nvece, cu panzamu a dhi tanti ristiani c'ogni giurnu rrischene la vita: cu ne dannu a manciare, cu ne dannu le medicine, cu frabbichene spedali, cu criene strumenti novi, cu prechene o cu bruscene li morti, cu ne difennene de li fiacchi ristiani e cu ne fannu li cumunicati su comu vannu le cose! Quanti medici e nfermieri su morti e quanti ne sta morene ncora e, puru ca nu n'annu buttatu lu sagnu, ttocca cu li ricurdamu sempre comu MARTIRI c'annu sacrificatu la vita loru su l'artare de la SANITATE de tutti li ristiani. Crazie Medici Santi e, cu tuttu lu core!