Di tutto un po'

Gita de Rosetta a Venessia.....

Donca.....mè nevoda Roseta la me somegia un tantinel, chioma rossa, oci castano_verdi, la xè na bèa putèa, nonostante la gabia passà i 48 ani non la li dimostra e fra mi e ela ghe xè solo sete ani de diferensa, cussì che spesso i ne ciapa per sorele. Alta, slanciata, elegantina, la gà el portamento de un gendarmo austriaco, eredità paterna hehehehe.....Comunque questo no tòl che i omeni per strada no i se giri a vardarla eh!?!?!.....Persìn el Nane un giorno (gera ani che non la vedeva perchè Roseta gera 'ndada a far uno stage in Inghilterra e la se gaveva fermà là 7 ani) vedendola per strada no la gaveva riconossua e la stava squasi par abordàr hehehehe..... Lo gà frenà la somiglianza co la sotoscrita  e quando che 'l me gà visto razunzerla el gà finalmente capìo che tale la Zia, tal la nevoda hehehehe.....Roseta intanto la se la gà ridesto soto i bafi (se fa per dir, oviamente).....

Ma vegnìmo a sabo scorso..... Roseta gera vignùa a Venessia a trovar la Zia che la adora ( no 'vendo vùo fioì me contento de curarme la nevoda  hehehehe ).....Dopo pransà, mentre mi e el Nane gerimo ciapai sul più bel de l'Oselada  la gà deciso de andar a far dò passi in Strada Nova, anca par digerir el frito misto che gavevo preparà assieme a la polenta per cui la va mata. Xè incredibile come quela creatura la magni e no la meta su un gramo de ciccia. Misteri de la Natura..... o sarà el temperamento iperativo che la consuma? Mah?

Nel mentre che mi e el Nane gerimo ocupaì a dar sfogo a le nostre Nature passionali ( devo sostituìr el leto  el cigola massa ) la nostra Roseta caminava su per ponti e calli, fermandose de quando in quando a vardàr na vetrina.....o a caressàr un gato molemente stirà su 'l uscio de casa a ciapàr el sol..... Stando al raconto de Roseta, la gera rivada sul Ponte de Le Guglie quando la se gà inacorto che un ragasso de l'aparente età de 30, 35 ani la stava seguendo da circa un'oreta. Sui primi la gaveva pensà che 'l fosse un turista o un foresto che ghe piaseva caminar e curiosar i angoli de Venessia, ma vardando le vetrine la se gaveva inacorto che el "putèo" (ciamemolo cussì vista l'età ) la oservava speciandose sul vero de le vetrine. Roseta gera un poco incuriosìa, ma la vegniva fora da una storia finìa mal e de omini non la voleva saverne, cussì la mantegniva le distanze col sò portamento altero. Beh devo dir che quel giorno, coi jeans atilati blu, i stivaleti neri a taco alto e la maglieta scolada a Madona verde aqua, la criniera de cavèi rossi e la borseta a spala, la gera un bel vedàr e la mostrava diese ani de meno. Fato stà che la ga resistìo ancora diese minuti nel essar seguìa passo passo..... per altri 300 metri..... Ad un certo punto stufa de 'ver stà ombra sui calcagni la se gà girà de scato mentre la stava caminando lungo el Canal Grando.....El "putèo" preso de sorpresa xè indietreggià e..... SPLASSCCCccchhhhh!..... el gà fato el volo del cocàl fulminà in Canal!.....

Morale de la favola? I lo gà ripescà i gondolieri che gera là vissin, grondante aqua e co na fogia de insalata messa su le ventitrè in testa proveniente dal scarico imondissie del vissin Ristorante. Roseta gera confusa e divertìa nel contempo.....I gondolieri no gà risparmià batude, frizzi e lazzi al povero "putèo" che gà dovesto far ritorno co la sporta svoda a casa. Batude del tipo: "Cocàl no te sa ancora che par navigar in Canal ghe vol la patente?"..... opure: "Ocio a dove te meti i oci che te finissi in padèa!"..... opure: "Na putta cussì xè come un bocòn da re e no da baròn!".....etc etc etc..... opure ancora: "El voleva pescàr na putta e 'l gà finiò co'l essar pescà come un molo"..... Ve risparmio el resto che no ghe xè stà risparmià al povereto..... A Roseta pò gà scuminsià a farghe pecà, ma el timòr che 'l spetacolo andasse 'vanti ancora la ga fata tornàr sui passi e vegnirme a contàr el tuto. El Nane de sorapiù el ga agiunto (da l'alto de l sò esperiensa ) :"Squasi squasi meto su na scuola par insegnar l'arte del cortegiamento....i zoveni de ogi no i sà manco l'ABC nè coniugàr fati e paròe hehehehe "

Questa xè Roseta, un misto de burbero e de dolse infarinai insieme.....Ma chi che riussirà a conquistarla farà un bon afàr.....Parola de 'l Ragionier Spiletti che el gà perso el sono da quando che la gà vista......

Siorìe Lustrissime, Paròna