BLOG DEI FIOI

TRAIL COI MERCURYUS

Grandissima trasferta dei Fioi domenega mattina in quel de Cordignano par 'na spassosa meda giornada in compagnia dei numero uno senza se e senza ma……i Mercuryus.
E quindi partendo dall’inissio… a M e rivando aea fine a S (MERCURYUS) ve spiegarò lettera par lettera a beissima avventura!
M come … MORANDIN … par chi no lo savesse le el Presidente del Gruppo Sportivo Mercurys, persona vera e sempre disponibie.. ma co dise sempre le sempre.. pensave che dopo a cinquantesima domanda sull’affiliazion aea Fidal el me mandasse in mona e inveze ghe mancava poc che a quota de iscrizion el me a pagasse lu!
E come … E A ILARIA DOVE EA?? No parchè dopo aver assistio al soccorso dea pora Antonella, la si tale Ilaria detta Doberman l’ha ben pensà de montar in macchina anca ea saltando i ultimi zinque chiometri. Furbissia fatta persona… metti che a Antonella no a ghe a fasesse a farse a doccia, ghe n’era ea… metti che Luciano el sbusasse a gomma dea macchina, ghe n’era ea… metti che a Antonella a voesse testar i segioin ribaltabii de a punto del Pres… no ben ghe n’era ea!!!
R come … RIPIDO ...Col timor reverenziae che noaltri Fioi se se lamentasse del poc dislivel del percorso....i nostri amici i me ha fracà dentro un per de saìte che te e raccomande...gnanca el nostro fuoriclasse SVEDESE al secolo Carlo Colla in giornata de grazia nol sarìe stat in grado de corrarle tutte... Tutte bee e soprattutto panoramiche (peccà paa foschìa...)....da rifar anca doman mattina se fusse possibie comunque... Memorabie a saìta al monumento dell’aquila in medo a tutte chee crode co Cesco che scandiva el passo e no se iera boni de starghe drio..
C come … CESCO … cossa vutu dir su sto personajo qua?? cioè questo qua, basta che el decide… e dopo averte tranquiamente superà el podarie anca cichettarte sua testa senza gnanca un sguinz de fadiga e asarte la impiantà…. e inveze le la che l’impenisse de paroe i pi veoci, el speta i pi lenti e el dispensa consigli sua corsa e su tut quel che ghe va drio.. “uno di noi”
U come … UN ORA E DIESE … e ultime paroe famose del Pres Luciano: “guarda da casa vostra ci vorrà un’ora e dieci”!! Zio billy te te fidi de uno che la ha fatta pi de na volta… zio billy se proprio bisogna darghe un margine de errore te parti un sguinz prima cussì le meio essar la in anticipo pitost che ciapar paroe.. morae dea favoea.. ora 6.30 partenza ore 7.10 son sul piazzal del campo sportivo de Cordignan…”fame un piazer cata un bar (aperto) che n’don bevar un caffè”.
R come … RUMINANTI Quel che me pareva de essar (parle par mi ma me paesani no me pareva tant de manco...) dopo i 25 km e dopo a doccia davanti a chel ben de Dio che ghe iera intzima a panchina fora dai spogliatoi... Mi no so chi che l'e e ste "LURIDE" tant famose, fatto sta che tra tramezzini, torte salate, grissini ripieni aa sopressa (NUMARO UNO!!!) e un per de birre no saveve pi par dove girarme...su de mi ha riscosso grande successo a focacciona de color arancione....indrio schena...!!!  Dopo e rivà el pres coa schiacciata cocco+cioccolato e col pasticcino finae par chiudar in bellezza... Tasi che a macchina la guidava l’Hondureno sennò me avarìe toccà darghe e ciavi a qualcheduni...
Y come … YAK … si parchè no savendo cossa aspettarse noialtri Fioi se son caricai de tut el possibie inimmaginabile, proprio come se carica i Yak del Tibet…..gente co barrette energetiche che gnanca aea UTMB, borracce da litro de maltodestrine, mancava solche e ciaspoe da usar in caso de neve.. si insomma col senno di poi se podeva assar tranquiamente casa tut…
U come ... ULTRAMARATONETI ... io lascia...imboscài in medo al gruppo dei arancioni 'na sfilza de gente che l'ha portà casa pi de 'na corsa oltre i 42 km...senza gnent cavarghe a nessuni ricorde solche alcuni nomi....BOLZO, SERGIO, GIANNI e el famoso DALL'ACQUA re dee discese spericoeae... Noaltri fioi non son gnincora nessuni...
S come … SEMPRENUMERIUNO … se o saveva già prima de partir che sarìe stat na bea corsa ma soprattutto in bona compagnia… ma questi qua del Mercuryus i te fa sentir talmente casa toa che anca i posti i se ciama come quei che te si abituà a corrar ogni settimana… “Madonna degli Scalini” come “Madonna del Roron”… “CollAlto” come el nostro “Collalto de Maser” e a cesetta del “Castelir” come a cesetta de “San Giorgio”… grassie grassie e ancora grassie!