PRESICCESI NEL MONDO

LI SPIRITI

LI  SPIRITI

di Luigi RIZZO

Sta mpuna 'u sule e nsèrrene le porte

Nun ci stà cchiui ci chiance li sabburchi

volene pe l'aria l'anìme morte

ssute de li cascioni e de li surchi.

Tutte le notti ampena ca scurisce 

nc'è nu va be' de spiriti dannati

 nc'è chiru ca cull'avitri s'unisce

e chiru ca va sulu, scumpagnatu.

A na ccert'ura de la mmane mprima

a facciffrunte stannu su 'a carrara

de na menza e l'avatra fenca a ncima 

comu ca nu parite li separa.

De qua vanna nci su' li mascarani

 ca ogni notte fannu li  trumenti

e stannu sempre comu catti e cani

cu l'acquarisi chini de lamenti.

- Nu m'iti fatta salutare sorma, 

ca  pe maritu tinne n'Acquarisu

 e sta precata, comu vole norma -

crida nu mascaranu stannu tisu.

- Siti vui Prusicciari ca vuliti

cu nu banimu ntra lu vosciu cantu

e zati tisi a menzu sti pariti 

ca spacchene pe curtu 'u campusantu.

Nu spiriteddhu cu la facce janca:

- jeu – dice - su lu primu acquai precatu

ca squicciatu spicciai sutta na chianca

e ntra stu chiempu m'aggiu ntarassatu,

na fiata e doi, cu lleu sta sansa scema!

- Vui Mascarani siti sempre storti -

dice n'avutru, cu la vuce trema -

- tirati petre 'u giurnu de li Morti .

Nu spiritu, fuscennu comu jentu,

face segnu cu se stannu citti:

-Jeu, lu settantasei de l'ottucentu

la scena ca nc'è moi, jeu me la vitti.

-Stefanelli su' de li Mascarani

a l'Ancili vulia la seburtura

ttuccò persuadu poi li paisani

ca è meju cu lu pizzu la cuddhura;

- llevatili de menzu i campanari

scurdative le petre e li pariti

ca mo li do' paesi suntu pari 

e ncardasciati, stannu sempre uniti.

-  Cu lu nnazibanire, jeu me crisciu,

ca lu paese nou ddaventa ranne

e comu quannu già ca mo lu visciu,

stu campusantu spostene a dhe vanne.