PRESICCESI NEL MONDO

QUANNU ME NZURAI IEU

Da Recite e farse di E. Cazzato

8 - QUANNU ME NZURAI IEU

Quannu me nzurai ieu, sai quantu ippi de rosciamenti?

Dodici ducati cu tutti li complimenti.

Ippi ‘na bancateddha a croce pe’intra la cucina,

nu specchiu allu parite e sei segge de ‘na lira l’una.

Poi ippi sei piatti russi, facci sutta’ntra la fanescia,

‘na pignata e ‘na farsura,’na tajedda pe’ manescia,

doi quatri a ncapatale, cinque sordi de basetta,

la ‘mpisi de costi allu lettu e me facìa de colonnetta.

Lu scarfalettu de creta, la lucerna e lu luciarnaru,

la panara de lu pane, la strasceddha e lu farnaru.

Poi ippi ‘na mattra panca china de biancheria,

‘na scala cu sei scaluni cu ‘nchiani la scansìa.

Poi ippi ‘na vozza de mieru ca chira me piacìa a mie,

‘nu patale chiunu d’oiu e n’avutru de vulìe,

la pruvista de legumi, de ranu ‘nu cistuzzu,

‘na limma de tre sordi e lu pede cu ‘nu pizzu.

Qusti fora li rosciamenti ca ippi de casa mia,

moi, senza cu sannu scrivere, volene la scrivania.