PRESICCESI NEL MONDO

LI PRUVERBI

LI PRUVERBI

Aggiu sempre ntisu dire e, se dice ncora, ca de li pruverbi de li ntichi, nu ne fallisce nuddhu. Erene li pruverbi ca ndrizzàvene li nnantisciuti nosci ntra la carriggiata de lu stare a pparu a l'àvitri ristiani. Mama, bunanima, li canuscia tutti e ne dicia sempre unu a culure de la circustanza, e jeu, a furia cu li sentu tutti li giurni, me nn'ia mparati na bona pursione.

Ma poi me ncorsi ca muti de isti, tanìvene lu pruverbiu cuntrariu e, cu fazzu belanare mama, quannu ne mmuntuvava unu iddha, jeu li rispunnia a tonu.

Cu me spiecu meju, tante fiate nu me criditi, ve mmosciu chiri stunati ca me su banuti a mmente e li scriu cu le lettere ca pènnene a manu daritta:

• Fa bene e scòrdete, fa male e penza

• Ci face bene pate pene.

• Cavìta, ca crai è cchiù logNu de osci

• Meju l'ovu osci cca la caddhina crai.

• Li sordi suntu de lu diàvulu

• Senza sordi lu fischettu nu sona

• SagNu cu sagNu nu se face acqua

• Li parenti su li denti

• La sparanza è l'urtima a murire

• Ci stane cu lu datu l'esse l'anima e lu fiatu

• A tuttu nc'è rrimediu tranne cca a la morte

• A casa brusciata minti focu

• Paru cerca paru e paru pija

• Ccùcchiete cu chiri meju de tie e falli le spese

• La mujere te nchiana e la mujere te scinne

• Quannu te nzuri te mpasturi e te ncaggiuli

• Lu Signore te chiude na porta e te apre nu purtune

• Spetta ciucciu meu ca masciu vene

• Li fiji su comu Diu te li dà

• Li fiji su' castichi de Diu

• Li fiji su piezzi de core

• Fiji piccinni cuai piccinni, fiji ranni cuai ranni

• Ci te nchiana, te vole bene

• L'onori cu castichi de Diu

• Ci se ccuttenta, code

• Sordi chàmene sordi

• L'onoziu è lu tata de li vizi

• Ci fatica ane na sarda e ci nu fatica ne ane una e menza.

LI CHIANTI CA ME FICI

LI CHIANTI CA ME FICI!

Lu state de lu '41 foe cchiù logNu e cchiù cautu de l'ùrtimi anni. Vannamamme prima cu spiccia lu mese de acostu percé l'ua sta ssiccava su li cippuni. Nu chiuvia de nu saccu de tiempu e puru le vulie, senza acqua, nu se ngrussàvene e cadìvene a nterra a nnòzzuli.

Nui stìvene ncora a fore le fiche a la Madonna de la Rutta e mama ncarnò mie e sorma la piccinna, ca poi era quasi tre anni cchiu ranne de mie, cu ccujimu le vulie menze siccate, ca poi lu tata le vinnia e li sordi ne li dava a nui.

Ccoja tie ca ccoju jeu, fomme boni cu ne nchimu nu menzattolicu curmu, ca sirma lu vinniu pe doi lire e le spartiu: vinti sordi a sorma e vinti sordi a mie.

Jeu tania quasi sette anni, ca su natu a gennaiu, ma tannu nu te piàvene a la scola ci nu li tanivi tutti li 7 anni. Mama, mbrufittannu ca la mescia de scola, ca ìa tanire la prima quiddh'annu, era la signurina Sarau, me ccumpagnò a dha iddha e, cu tuttu ca se canuscìvene bone, percé ppena rrivata a Prisicce de dhe vanne cu màmmasa, vinnara cu àbbitene tuttedoi a casa mia, nu vose cu me pia mancu de scusi.

Nu giurnu, nzignate le scole, sorma s'ìa ccattare nu quadernu e nu penninu novu ca lu vecchiu s'era ruttu cadennu la pinna nterra e jeu vosi cu bau cu iddha a dha lu Totu de la Parma, ca vinnia le cose de scola e tania la putea a Saggiorgiu, rretu a li Suronzi. Me ccattai, cu me mparu cu scriu, nu quadernu a richi de prima e nu làbbisi e spisi menzi sordi de tutti chiri ca tania, percé quattru se ne scira pe lu quadernu e cinque pe lu làbbisi.

Li ùnnici sordi rrimasti me li chiusi boni boni ntra lu ccasciteddhu de rame janca ca mama m'ìa rricalatu, doppu ca s'ìa sucate le pastije de lu Rressole, cu li passa la doja de cannavozzi,

Mancu a la fera de Santu Ndrea e mancu pe le feste de Natale, vosi cu me spennu dhi ùnnici sordi ca m'ìa buscati cu lu suduru de tanta fatica e me rrimàsara sani sani fenca a lu diciassette de marzu, quannu la mmane mprima ttuccò cu bau, a paru a tutta la famija e, a la mpede, fenca a Dacquarica, ca era mortu lu nonnu Luviggi, lu sire de mama.

Dha mmane facia friddu e me misi lu capputteddhu cu lu capucciu ca m'ìa fattu mama prima de Natale percé l'ìa ccumpagnare cu ssiste sirsa ca nu stia bonu percé le quattru suluri s'ìvene ncurdate cu stannu na samana padunu cu bàdene a li bisogni de lu tata loru malatu.

Prima cu ssimu de casa, me vìnnara a mente l'ùnnici sordi e, cu nu li llassu de suli, me pijai lu casciteddhu ca tania ccucciatu, panzannu mo ca me putìvene sarvire a lu bisognu.

Rrivamme a casa de lu nonnu ca stia su la via de li Pedaci e facia agNulu cu la via de la Nucita de la menza de la chiazza de Saggiuvanni. Truvamme la casa china de gente e passai tutta la mmane trasennu e ssennu de la casa de intra a dhu lu nonnu stia stisu mortu su lu lettu ranne a sutta a l'arcova. Ogni fiata ca trasia e vidia mama chiancire, chiancìa puru jeu e quannu me ne ssia, scia cu sciocu ntru sciardinu cu la sula cucina, quasi sozza mia, ca tutti l'àvitri diciottu èrene mutu cchiu ranni de nui.

Versu menzidia lu sule nzignò a scarfare l'aria e, pe lu càvutu, ttuccò cu me lleu lu capputteddhu e cu lu mintu susu a chiri de l'avitri ristiani ca stìvene mmuntunati susu a la banca, ntra la casa ppena trasi, posta propiu su lu ntavulatu de lu traùcculu cu scinni sutta a la cantina. Me ncorsi ca m'ìa straccatu cu tegnu lu casciteddhu de li sordi, pe tutta la mmane, passatu de na manu all'àvatra e cusi panzai cu lu ccucciu ntra lu capucciu de lu capputteddhu meu, nturtijatu bonu bonu.

Nu l'issi mai fattu! La sira quannu mpunìu lu sule e se fice ssantire lu friddhu, cercai e truvai lu capputteddhu meu, ma ntra lu capucciu nu nc'era cchiui lu casciteddhu cu li ùnnici sordi mei, me l'ìvene rrubbatu.

Me misi a chiancire pe daveru cu tantu de làcrime a l'occhi. Le ristiane ca me vidìvene a dhu statu me mbrazzàvene e me cunfurtàvene, dicennu:”vardati, ristiani mei, comu è dispiaciutu stu vagnone c'ane persu lu nonnu. Ci sape quantu li vulia bene!” Ciuveddhi sippe mai ca jeu nu chiancia pe la dulore de lu nonnu mortu maperò ca m'ìvene rrubbati tutti li sordi mei.

Sulu dopu sìdici anni sippi ca li sordi se l'ìa rrubbati cucìnama lu Ucciu de la Zi Cesira, pace a l'anima sua!