Su frore, da pagu prus a mancu, est tundu, gasi sempere de colore rosa. Est cumpostu de chentu fozzas e prus; e tenet unu fragu delicadu e bellu.Sas calidades connotas sunt prus de chentu. Froridi in su mese ‘e maggiu e creschede in cale sisiat logu. Dae ‘nue siat bennida sa rosa de chentu fozzas non s’ischidi.Sos antigas gregos naraint chi Clori sa dea de sos frores, pro la poder criare, na’chi haiat pedidu azudu a sos ateros deos. Apollo na’chi li haiat dadu s’isplendore, Afrodite sa bellesa, Dionisiu su fragu bellu, sas tres Grassias sa grassia e Zeffiru una fortuna eterna e crara comente su chelu sena nues.A sa matessi manera est sa paristoria de s’ozu ‘e rosa: in su riu de su giardinu de su palattu reale na’chi b’haiant bettadu abba ‘e rosa chi su calore de su sole na’chi tiat haer fattu chirrare s’ozu dae s’abba.Sos persianos, de zertu, cunsideraint sa rosa comente su mezzus frore. Diffatis pro sas festas nde ispravinaint sas carrelas. Issos sunt ‘istados sos primmos a fagher s’abba ‘e rosa (abbardente). E dae tempos e tempos la ‘endiant in tottu su mundu assoras connottu, finzamentas in Sardigna.In medas logos de su Mediteraneu, oe chi est oe, si usat de rezire sos istranzos ispunzolandelos cun abba ‘e rosa. Cun sa rosa si faghent profumos e fummentos e finamentas resolios, duches e mandigos. “Si has duos soddos negusciadinde unu pro su pane, cun s’ateru comporadi una rosa pro s’amima tua” narait unu poeta persianu, prus de milli annos como, chi teniat in meda considerazione custu frore. Modos de narrer:Friscu che rosa, Bella comente una rosa.