occhiodivolpe

T' aggio 'ntiso ca parlave
cu' n' amica a Piazza Dante ,
sì , mme stive arreto 'e spalle 
tu parlave , essa rereva .

Nun me so' vutato maje ,
tu nun m' 'e guardato maje ,
aggio fatto lento 'o passo
dando 'o canzo 'e surpassà .

E scennenno pe' Tuleto
me pareva 'e sta' cu' tte ,
tu parlave fitto fitto
comme 'o core 'mpietto a mme .

Comme maje io e tte accussì ,
doppo tante giuramente ,
tante lune testimmonie ,
e mo staje luntana 'a me ...

Doppo piazza Carità
so' passato all' atu lato ,
te guardavo a passo svelto
chiacchiarà senza penziere ;

tu passave mmiezo 'a ggente ,
tu passave indifferente ,
io luntano te guardavo ,
sotto 'e vveste te sapevo .

Io te saccio . 'E ccarne toje
tutte annure 'mbraccio a mme ,
e tu saje comme te saccio ,
nun te può scurdà 'e me .

'E vutato pe' vvia Chiaia ,
sì scumparsa int' 'e vvetrine ; 
fermo llà 'nnanz' 'o Gambrinus
t aggio visto scumparì ...

PER LEI