occhiodivolpe

Sempe nun tène a mmente
'e stà sulo cu' mmé ,
nun tène 'nfaccia 'o scuorno
d' ascì cu' ddoje e ttrè ,

ma quanno stammo assieme
me guarda cu' gulìo
e po' s' abbocca 'nzino ,
se squaglia a suspirà ...

Cu' st' aria 'e  santarella
parla cu' na vucella ,
nun s' arravoglia maje
mmiscànno 'e vverità ,

ma po' me chiamma sempe
pe' ffà pace cu' mmè ,
e sape tutte ll' arte
pe' sse fà cunzulà ...

Sempe 'na resatella
quanno nun sa che ddì ,
e po' zennianno ll' uocchie
se ggira p' 'e scanzà ,

ma quanno essa fà ammore
va pizzuliànno forte
e nun s' arrènne maje
'sta masta 'e 'nfamità ...

Tutte 'e bucìe che ddìce
tu stessa po' t' 'e ccrìre ,
te 'ngrife comme 'a gatta
quanno te faje scuprì ,

ma quanno te pretiènne
ca ì tengo sulo a tté ,
allora alliscio 'a carta
ed è sempe 'nu trè ...

....... allora alliscio 'a carta
ed è sempe 'nu trè ...