occhiodivolpe

'a dumméneca ammatìna
me ne vengo a passiggià ,
me ne véco bbuono assaje
'mmiezo 'a via manco 'nu cane :

pare strano doppo 'a state
nun veré pe' tutte parte
tavuline e buttiglielle ,
scupature a faticà ;

vìre lloco tutto è vuoto ,
tutto pare cchiù pulito ,
che bell aria : stòngo sulo
chiano chiano a passiggià ..

sotto all' àrbere 'e palumme
pizzulèano tuorno tuorno
e 'na jatta arreto 'o tronco
se frusciasse r' 'e piglià ...

vaco pede catapède ,
sulo sulo : int' 'o silenzio
siente 'ncoppa 'a preta 'a scarpa
e 'o rummore m' accumpagna ...

ca si ancora stammatìna
essa steva dint' 'o lietto
mo cu' mmé , pe' 'mmiezo 'a via ,
essa steva a passiggià .....