occhiodivolpe

m' aggia fà 'nu ciardiniello
'nnanze 'a casa 'ncoppe 'e ggrare
ca chi saglie p' 'o scalone
s' adda proprio arricreà ...

una ccà e n' ata llà
ficherìnia cu' granate ,
quacche chianta 'e rosmarino ,
rampicante e chiantulelle ..

po' tre o quatto 'e chelle àgave
chelli vverde , azzurre e gialle
e l alòe ma chella vera
ca fa pure bbene 'a pelle ..

tuorno tuorno chelli cchiante
ca nisciuno va accattanno
ca sò bbelle e appariscente
si ll' appare una cu' n' ata ;

adda ascì una verzura
comme fosse 'nu salone :
'a bellezza ch' esce fore
'a int' 'e ccòse puverelle .