occhiodivolpe

- tu che bbuò ? che vai cercanno ?
sempe ccà a ffà 'a pusteggia,
sempe annanze 'o tabbacchino
a spià si guardo o scengo ...

nientemeno ? io po' accussì
senza niente a che penzà
stesse ccà a guardà a isso
si m aspetta o se ne va ?

che se crere ? s ammuìna
ca io ccà adderèto 'e llaste
a guardà 'o bellimbusto
me ne vaco 'e capa e scengo ?

ma vattè .. vattènne 'a casa,
tu cu' mmè fai palla corta,
sì .. aspiette, aspiette e fuma
tiene voglia r' aspettà ,

ca si po' tengo 'o gulìo
'e sentì comm' è 'a voce,
si tenesse ll' uocchie nire,
e si sape m' aggarbà ...

ca si po', ma doppo a tanno,
vìre tu che 'o stabbilisce
proprio sulo 'a sottoscritta :
tu, cu' mmè, fai palla corta.