PRESICCESI NEL MONDO

LA DOMENICA SE MBRIACA LU CUMPARIERE

Da Recite e farse di E. Cazzatp

3 - LA DOMENICA SE MBRIACA LU CUMPARIERE

Personaggi:

Cumpariere – marito.

Moglie

Cumpariere:

Sciamene cumpare ‘Ntoni, cumpagneme a casa mia,

sto maru cu muierama, pè na cosa de fesseria.

Quannu me ne vo sulu, cumenza a predacare,

ieu ca vo mbriacu, la usu mazzisciare.

Tania fanucchi allu sciardinu, quantu nu capu de criaturu,

su sciutu stammane mprimu, nu n’aggiu cchiatu mancu unu.

Chiri mustisci de fili mei, cumenzene a terrisciare

e tutte le meiu cose le dannu alle rufiane.

Li primi frutti e le cose chiù cridite:

‘na parte pe’ le rufiane e l’autra pe’ le zite.

Aggiu rimproverata muierama allu ritorno de la chiazza,

ca l’aggiu tuccati li fii, ha fattu ca se ncazza.

E ieu picca ne vulia, ca pe’ la cumpra stia stizzatu,

me ne su’ ssutu de stammane e cusì m’aggiu briacatu.

Mo nu tegnu lu curaggiu cu me ne vo a casa,

de mieru me n’aggiu vipputu cchiui de na capasa.

Moglie:

Sì vantete, ca faci bonu, tutt’osci cu nu te ritiri,

sta bbidi ci bell’esempiu me sta dai alli fili.

Ma m’aggiu ‘ccorta de stammane ca tenivi chira ‘ntenzione,

cumanzasti de li fanucchi cu trovi quiddha occasione.

Vulia ssacciu de dhu vene cu vai te diverti,

pe’ la perdita de la cumpra de Conte Alberti.

Marito:

Hai ragione, che scunfitta, nu s’avissera mai criate,

all’anima de la cumpra, quante famie ruvinate.

Ma nu te piare pena ca ‘mposta su tardatu,

pe’ l’affare de la perdita, avimu tuttu cumbinatu.

Quannu su’ ssutu stammane c’erene autri cumparieri

e simu sciuti tutti cu ne facimu ‘nu bicchieri.

A ddhai c’erene ristiani ca cumpra nunn ànnu piata,

santivene lu discorsu nosciu e se facivene la risata.

Allora imu risulutu cu li facimu crepare,

n’imu ssattati e n’imu posti a sciucare.

Tie sai… ca pe’ lu sciocu… tegnu propriu ‘na simpatia,

sciucava notte e giurnu, se truvava cumpagnia.

E poi dopu sciucamu a cocule, ca trovu cchiui divertimentu,

ca la sciurnata de osci,sai, m’è parsa nu mumentu!

Moglie:

Ca già ca allu sciucare trovi divertimentu,

ma cu manchi ‘na sciurnata, ieu fazzu pensamentu.

Tuccava cu te vergogni, cu faci quistu parlare,

nu padre de famia, cu pensi sempre allu sciucare.

Marito:

Aspetta… nu’voi cu senti l’urtima conclusione,

spicciatu de sciucare imu fatta ‘na discussione.

Ci purtava paragoni, ci belli pareri

e de quannu a quannu ne facivene ‘nu bicchieri.

Sai, nunn erene manciatu e pe’ la cumpra frasturnati,

bicchieri nanti bicchieri, tutti n’ imu briacati.

Poi imu piata la decisione, stavene tutti boni de mieru,

ci ha fattu de avvocatu e ci de pubblicu ministeru.

Ieu aggiu fattu de giudice e su rimasti tutti contenti:

pe’ la perdita de la cumpra nu pacamu propriu nenti!

Moglie:

Basta mo e nu cuntare cchiui, sì, t’avimu capitu tutti.

Oh! Quanta scienza va data lu mieru de ’ntra le vutti.

E quista è la conclusione ci aviti tutti cumbinati:

ca la perdita de la cumpra nun c’è bisogno cu pacati?

È passatu chiru tiempu ca no tutta la pacavi,

ma moi ve ncatinene cu firmati le cambiali.

Poi le girene alla banca e tocca cu le pacati

Oh, benedittu ci l’ha posta “Lu Marchese e lu Galati”

Hai vistu de fore la banca cci segnu de catina,

è bona, ma pe’ ci avanza, pe’ ci ha dare, è ‘na ruvina.

Marito:

Quannu m’aggiu confessare, se voi cu te dicu lu veru,

primu cu vo allu padre, m’aggiu binchiare de mieru.

Te ricordi all’autra entrata! Percè tannu nu castimasti

ca li debiti ci tanivi cu la cumpra te li pacasti!

Così è fattu lu munnu – sai - ca sempre va girannu.

La busca de l’autra ‘ntrata l’imu scuntata st’annu.

Ma se ‘ffranchene cu la girene, chira busca l’imu spicciata,

ma se Dio ne dà la vita, li pacamu all’autra ‘ntrata.