PRESICCESI NEL MONDO

LA CUMPRA

Da Recite e farse di E. Cazzato

2 - LA CUMPRA

Personaggi:

Signuru (il proprietario),

Fattore,

Cumparieri (chi aveva acquistato la cumpra).

Signuru:
Menu male ca sto attentu alli mei affari,

pe’ prima cosa hannu firmate le cambiali!

A sapere, n’annu cu le vulie c’era ricapitatu,

cu la perdita de la cumpra, ciuveddhi m’avia pacatu!

Nu n’è ca moi me pachene, ma stannu cu llu pinsieri;

stasira l’aggiu avvisati cu vegnene li cumparieri.

Mah!... lu fattore è tardatu,

tegnu ‘nu bruttu presentimentu.

Se po’ truvare cu l’amicu e lu cumpare

e quarche bicchieri ‘sta sira certu da fare.

Fattore:

Vai truvannu percè ‘sta sira su tardatu:

culoni e cumparieri m’ hannu circundatu.

Stannu tutti comu pacci pe’ l’affare de le vulie,

volene ‘nu rilasciu e se raccumannene a mie.

Sta storia la pensava, percè sacciu de ddha mie,

a termine de picca tiempu, se persera menze vulie.

De tutti i santi me ddunai a sutta a Cumpignanu,

se le strusciavi, te ‘nchivene la manu.

Scincire poi,’na bellezza, comu tante perle,

ma dopu doi cadute, rimase l’ossu e la pelle.

E quannu scìu muierama, se ne vinne mortificata

e disse: imu spicciatu de coiere l’antrata.

Quannu vitti le vulie piccinne ca erene prima rosse,

subito pensai: li cumparieri s’hannu giustate l’osse.

E l’urtime scincire li costene chiù care

e tocca le prechene tutte cu lu sale.

Mo... ieu ci li pozzu fare, m’hannu postu a menzu,

cu te fazzu persuasu, se ne le lassi pe’ l’apprezzu.

Padrone:

Propriu ca t’hannu postu a menzu, nu li lassu propriu nenti,

se l’erene vulute pe’l’apprezzu, nunn’erene fatti li fatenti!

E poi ci ne su parecchi ca fannu li sciampagnoni ***

e aumentene le vulie ci cultivene li culoni.

E quannu è’na cosa torta, vou puru contru de mie,

me fannu urtare li nervi, quannu aumentene le vulie.

E perciò nu lassu propriu nenti, solo qualcosa a li culoni

e ca aumentene lu fruttu, nu su pè nenti furboni.

Quannu vene lu tiempu de la cumpra su’ accaniti,

ci va e scumpassa cisure, a ci cchiui sarta pariti.

La maravija è de le fimmene, comu le pizzaca l’apiceddha,

animene li mariti pè nu picca de cumpricedhha.

Poi perdene e le fimmene se mintene a castamare:

maledettu lu prezzatore, ca l’ha fatte tante care.

Fattore:

Dunque cusì è l’idea loru, mo fane sulu,

stasira certu venene e a quannanzi ce n’è già unu.

Cumparieri:

Tutta la colpa è de lu poveru, va fatica e jè ‘culpatu,

se sbaglia qualcosa è de tutti maltrattatu.

Chiru ca faciti vui sta bene, siti tanti ricchi miiunari,

vuliti fare li negozianti e ruvinati li ristiani.

Se perdene o guadagnene nu’ se ponnu regulare,

tantu aprene la casciaforte e ggiungene le miiare.

Lu poveru, se perde, pare e li diciti: li sta bene,

se vince poi, ficurete, nu’ diciti ‘n’ugna de bene.

Quannu fò all’autra ‘ntrata guadagnammo ‘na provvidenza

e vui, tutti pari pari, cumanzastive la maldicenza.

Se te videne la duminaca vistutu cchiù pulitu:

vì comu s’ ha mutatu pe’ la cumpra de l’Arditu?

Se te videne ‘ntra putea cu te diverti:

vi quantu fannu le vulie de Conte Alberti?

Se te vanìa ‘nu desideriu de ‘nu mazzu de rafianelli:

a ddhai ‘ncascia lu mieru pe’ la cumpra de lu Giannelli.

Allu povuru c’è l’invidia de qualunque cosa face:

se perde diciti …arraggia…, se guadagna …ve dispiace.

Ieu la fici pe’ lu meiu, ma poi vistu lu malpartitu,

lassai muierama alla cumpra e trasii ‘ntra lu trappitu.

Tutte le discrazie suntu sempre pe’ lu furese,

ca nunn ha fattu affari e ha avute fiacche spese.

Me ricordu all’autra ‘ntrata, me passavene pasta e pasuli,

ma quist’annu n’imu binchiati tutti de carne de favaluri.

Oh!... ci ‘ntrata scuncertata, specie poi pe’ li compratori,

s’hannu manati a precipiziu cu nucene vasche e motori.

Tutti stavene cull’idea ca era comu l’autra ‘ntrata,

ma quidd’annu vinti sei, ci lu cumbina n’autra fiata!

Su picca ci se ne vantene, sulamente chiri sensali*****,

‘na bona pursione, ma no tutti li proprietari.

E nui poi li compratori, senza oiu simu rimasti,

salvu poi pe’ chiu nanti, se nun ce su’ autri guasti.

Cu ne vegna poi pulita Pasca, a nui n’autra cosa manca:

le cambiali c’imu firmate cu le girene alla banca.