Su Situ de Nanni

Sa mendula (Mandorlo, famiglia delle Rosaceae)

 
S’albure de sa mendula imbattet finas a deghe metros de altesa. Hat fozzas a fromma ‘e lanza e su fruttu, a fromma  illonghiada, coler ‘ilde craru. Una curiosidade est chi cominzat a frorire primaria, a finitias de su mese de ‘ennalzu, e bogat su frore primma de sas fozzas.
 
Sa paristoria
Si narat chi a Fillide, sa fizza de su re de Tracia, piaghiat meda Acamante, su fizzu de Teseu e de Fedra. Su zovanu però, chi fuit unu valorosu soldadu de s’esercitu de Atene, fuit in biazzu, in d’una nave, pro andare a gherrare contra sa zittade de Troia. Cando sas naves fuint torradas dae sa guerra, sa bella Fillide non agatad prus s’ammoradu e, timide chi esseret moltu, dae su dispiaghere si fuit bocchida a manu sua.
Assora sa dea Era pro compassione l’haiat tramudada ind’un’albure de mendula. E Alcamante, torradu a regadiu dae sa gherra, hait agatadu s’albure inveces de s’isposa e no podinde fagher atteru si l’haiat abbrazzada folte folte. In cussu momentu s’albure na’chi haiat cominzadu a bogare su frore, primma chi ancora esserent bessidas sas fozzas.
 
Sas calidades
Su semene de sa mendula est de duas calidades: drucche e ranchidu. Dae sa calidade duche si ‘ogat un ozu bonu pro meighina. Benit usadu coment’e pruga e finzas pro fagher papinos e unghentos. In tempos antigos sa mendula si papait contra su dolor‘e istogomo. Oe s’ischit chi s’ozu de mendula potedet curare finzamentas s’ulcera.
Dae sa mendula rancida si ‘ogat un ozzu chi ‘entit usadu pro fagher profunos.
 
Sos antigos romanos usaint sa mendula druche pro fagher bellettos.
John Gerard, unu istudiosu inglesu de su XVI seculu, narait chi s’ozu de mendula allenad sa pedde de sas manos e de sa cara e la mantenet sana e pulida dae sas maladias, dae sas mancias e dae sas pipisias.
S’ozu de mendula druche oe benit usadu, ammercuradu cun cassia, comente unghentu pro sos chirrizzzos.
 
Curiosidades
In su 1372 sa reina de Franza, Giovanna, muzere de Carlo V de Valois, cheriat 227 chilos de mendula pro si fagher s’ozu de si frgare in cara.
Giuseppina, muzere de Napoleone, usait un’unghentu cun pasta ‘e mendula pro sas manos.
 
Ateros usos
Sa mendula, druche e rancida ‘enit usada pro fagher druches. In Iscanu si faghen sos ammarettes, unu druche aprezziadu chi si accumpagnada cun binu biancu ‘onu..
Attensione però a non nde papare meda: sa mendula ranchida cuntenit venenu. Tres ammarettos podent bocchine unu pizinnu.
 
Sa rezzetta antiga de sos ammarettes:
Mesu chilu de mendula druche, mesu chilu de mendula ranchida; mesu chilu de tuccaru, sa colza rattada de duos limones mannittos, ses biancos de ou.
Iscolzade sa mendula, ponindela a modde in abba uddinde pro calchi minutu, assutadela bene e maghinadela.
Tribagliade sos biancos de s’ou, aggiunghidebi su tuccaru, su limone rattadu e sa mendula e murigade e tribagliade bene cun su pistone.
Cando sa pasta est bene tribagliada, faghide muntoneddos de pasta e assetiadelos in d’una lama de furru, no tantu affaca s’unu a s’ateru pro chi no si attaccan a pare comente coghen. Infurrade e lassade coghere a 200 grados pro unos deghe minutos finas chi diventan in colore ‘e oro.