Di tutto un po'

Come ogni ano mi e el Nane se gavemo impegnà co la solita banda de scalmanàì a vestirse in maschera. Quindi semo 'ndài su in sofita e gavemo verto el baùl del Prozio Bepìn, noto atòr venessian de la comedia de l'arte..... Tra palandrane de varia fogia, colori e ricami, pantaloni co' i botoni sul dadrìo, camìse sfarfalegianti de pissi e fiochi e capèi da festa xè saltà for anca un completo stile Casanova, co' la giaca a dopia còa, de arasso venessian rosso, bianco e oro (insoma na scicheria), i botoni de madreperla, le braghe de seda crùa e parsìn un paio de scarpe co la fibia in oro che nemeno el più bravo artigian de La Serenissima, noto Segalìn, sarìa stà capasse de farle uguali. Insoma el Nane gera vestìo come un vecio zentilomo venessian ( gnanca tanto vecio )..... mancavo mi ..... e là a spacarse la testa par vedàr de far na roba originàl..... De cossa me vesto? Cossa me meto? No gavevo vogia de crinoline setecentesche e paruche (no soporto niente in testa) , quindi..... Parchè no sfrutar quèo che Mare Natura ne la sua infinita bontà la me gaveva regalà in cùna? Son partìa come un razo zò par le scale mentre el Nane se stava prontando, e son 'ndada a furegàr ne l'armadio guardaroba, in un scatolòn che tegniva sepolti i mè ricordi de Università. Gò tirà fora pantaloni, minigone, sotane a balze da i mile colori, na blusa co' la scolatura a la zingara e..... oplà l'idea! Gò sentìo sbater la porta de l'ussio de casa: el Nane gera zà andà fora: ben! La casa tuta par mi hehehehe..... Anèmo dona! a l'opera!

Ciapo in brasso tuto e me precipito in camera da leto e davanti al specio a figura intera gò inissìa l'operassion travestimento: Prima le mudande longhe de la Nona, coi pissi al genocio, ma la gamba in vista, dopo la camisa bianca che me lassava le spale nude, dopo le tre sotane a balse, una bianca, una nera e la terza, sora, rossa a rose d'oro e nere e bianche. Un bel corseto nero da le steche de balena co' le stringhe in vita da tirar finchè squasi squasi no te manca el respiro....uffff..... fffiuuuu..... fato! Dopo me sò infilada i stivaleti neri a taco alto rischiando de rebaltarme ne la foga. Infin davanti al specio a consàr i cavèi rossi e tuti un bocolo. Ghe gò dà na sgarzolada co la spassola e el risultà xè stà una criniera leonina da farghe paura anche al paruchièr più a la moda. Colane a cadena in gran quantità zò par el colo. Insoma un spetacolo, ma..... mancava el tòco final! Na sprussada de vernise per i cavèi rosso fogo e brillantini..... e na maschera nera sul viso che lassava intravedàr solo el brillàr de i oci e la boca disegnada col rosseto rosso jungla. Un masso de Tarochi veci e strausai in man e un sciale de seda nera pesante co le frange che fazeva strassico par tera xè stà el finàl de un creassiòn che me ga trovà sodisfata e piena de morbìn.....

Alè..... verzo la porta de casa, dago un ocio par vedàr se nissùn passa par la Cale e..... via in strada! ..... Fati gnanca 10 passi vado a sbatèr contro un grupo de mascare da fotografia, quèe che te vedi in cartolina a ogni angolo de Venessia, esposte su le bancarele in Strada Nova o in Piassa San Marco.... Scanso stò grupo alegro e anca un poco bevùo ( magari i gera pena vegnuì for dal bacaro poco distante pien de zente in mascara e no)..... Stago par imbrocàr la Cale che me porta vissìn a la Piassetta de i Leonsini (drìo la Basilica de San Marco par intendarse) che me ferma un grupo de foresti americani..... Mi scherso, me scanso ma stì qua me se para davanti e i me bloca: "Tu legere me carte?"..... E mi gò leto.....Insoma gò dovùo inventarme na predissiòn par ognun de stì tissi e gò anca intascà venti euro a prestassiòn (se me beca el Nane poareta mi) ..... e va ben! "Ogni giorno nasse un cuco e beato chi che se lo cuca" ( me lo diseva sempre Nono Felisse bonanima) ..... Rivo in Piassa e vegno cipada nel mezo de na danza de mascare tra cui diavoli, anzoli, infanti, preti e suore..... Stò girotondo finisse e me trovo sbatùa adoso a na maschera che riconosso subito da l'odor de la Colonia che ghe gò regalà a Nadàl..... El Nane!..... Ma me inacorzo squasi subito che no el me gà ancora riconossuò..... hehehehe.....zoghemo? Ma siiiii..... Xè Carnaval no? e ogni scherso val! ..... Fasso la vose in falseto come na cantante lirica (che abita vissìn casa nostra) e co qualche moìna caturo la sò attensiòn..... Lesiero acento francese, la vose strassicada..... insoma ghe fasso capìr che son a disposissiòn.....

E stò martuffo ghe stààààà...... Ah ben po'! Ora te sistemo mi! caro marìò.....

Vustu l'aventura? te la dago mi l'aventura! ..... Me fasso portàr tra spintoni e slarghi e slonghi sìn dentro el Floriàn ( a le trata ben le done eh?) e se sentemo in un angolo tra mile camerieri vestii da pinguini e foresti co' le machine fotografiche al colo che scata co i flash tanto da desorbarte. Aneme de i mè morti! Se rivo a respirar xè tanto..... El corseto co le steche strinze e no me fa squasi respirar ma la fòta xè tanta. Ah cussì eh? marìo mio ora te sistemo mi!..... Riva el Capo camerier e prima che el Nane verza boca sparo l'ordinassiòn che par no gabia meso soto i denti qualcossa da almeno na setimana!..... Thè, tartine, toasts, crostini, picoli sandwiches, dolseti, fritole ( a Carnevàl le fritote no pol mancar!) e anca na broca de cafè ..... tanto par scuminsiàr. Vedo el Nane impalidìr soto el beleto ..... eh beh el Florìan domanda 5 euro a testa per un cafè.....figuremose el resto hihihihihi..... A costo de sciopàr me buto su la guantiera de peltro argentà co tuto quel ben de Dio tanto che anca el camerièr me varda co dò oci preocupai e po', vardando el Nane, el ghe amìca con far pietoso..... Povero Nane? Povero un corno! Siòr martuffo! Sior traditòr! Marìo de fora, busìaro de dentro! peta che rivemo a stasera..... peta..... peta.....

Me abufo come un desperà scampà da un campo de internamento tanto che me meravegio anca de rivàr a tegnìr tanto..... El Nane molto compìto me pasa i piatini, tocando a malapena una tassa de caffè..... El me varda in tralice, sospetoso, ma el continua imperterito a far el zentilomo..... Vogio proprio vedàr dove che 'ndemo a finìr stasera!...... Mmmmmm bone le fritole..... a la tersa desisto..... molo..... se prima el corpeto me lassava a malapena respiràr..... ora el xè diventà un vero e proprio strumento de tortura..... Faso un soriso che forse quèo de un colombo inamorà deve esser parso meno ebete..... Gò la nausea, me gira la testa e bofonchio un : "Grassie no" davanti a l'oferta de l'enesima fritola..... Madona mia moro! Aiuto!..... El Nane se sporse e con fare da pesse lesso el me sfiora co i labri sul colo..... In altre sircostanse me sarìa sentìa rimescolàr dal piassèr, ma in quel momento me se stava rimescolando altro e..... Salto su dal divaneto manco fossi na mata e co na scusa sbiassicada tra i denti me precipito fora..... me meto a corèr come na disperada sercando de ragiunger i Giardini drìo Piassa San Marco..... Spintoni tra la zente, ma sento el Nane che me segue e el ciama: "Zingara fèrmate, vien qua"..... Più el ciama e più mi serco de slungar el passo, quasi inciampando tra le franze del siale de seda..... Un Pulsinela sbucà da no so dove el me ciapa giusto in tempo mentra stagò squasi par svenìr..... Me sento solevàr tra i brassi del Nane e no so con qual spirito no perdo conossensa..... La vendèta me stava costando cara..... "Ti no te gà ancora imparà a fidarte de to marìo..... ma cossa gò da far par inculcartelo in testa Rossa mia?"..... Me vièn da pianzèr..... pensavo che no el se gavesse inacorto che gero mi e invesse..... Gò el stomego ribaltà e lo prego de risparmiarme altri comenti e portarme a casa..... Co' Dio gà volesto semo rivàì sul porton de casa nostra, ma el Nane no me ga messo in tera e no so come, risciando de sbrissar sò par le scale lu stesso viste le franze del siale de seda che gavevo indosso, el me gà porta in bagno e.... dopo che me gero liberada..... sul leto nostro..... co quala delicatessa el me gà posà zò ..... me son vergognada e squasi no gavevo corajo de vardarlo ne i oci..... Pian pian el me gà tolto la maschera dal viso e mi gò sbassà i oci vergognosa..... Po' el me gà lentà le stringhe del corseto, vardandome co' tanto amòr..... Dio quanta passiensa gàlo co' mi stò omo?..... Me son riavùa bastansa da spicicar dò parole: "Me despiase tesoro, son na tonta a volte, lo so..... me vergo....." El Nane no me fa finìr de parlàr che el me sera la boca in un baso travolzente..... Pàrte el corsèto.... pàrte la camisa..... el regiseno..... i mudandoni..... le calse..... pàrte anca la testa mia..... Gò un omo che me sta fazendo tocàr el Paradiso e ..... beh! Che cossa volè savèr altro? Curiosoni!

El Nane me sta vardando tra el torvo e l'incuriosìo mentra che fasso ordine in studieto. L'altro giorno me xè capità tra le man na vecia foto de quando frequentavo Ca' Foscari, me la gero squasi desmentegada hihihihihi....son imortalata co ale spale un vecio compagno de corso che me faseva i oci dolsi a l'epoca, anca se no'l xè riussìo a "tociar ne la squèa" come che'l sperava .....cussì el Nane che xè sempre curioso come un gato che varda el sorse prima de saltarghe dosso el me gà ciapà de sorpresa e el me ga fato un interogatorio de terso grado..... Mancava la lampada impiantada ne i oci e gero in piena indagine. Gò dovùo sudàr anca le camize de riserva oltre le fatidiche sete par calmarlo. Incredibile? Stò omo xè ancora geloso de mi dopo 25 ani che se conossemo.......... e invesse stavo sercando un nastro par ligàr el pacheto del regalo per el sò compleano.    Eh si! El Nane gà compiùo 50 ani.....el tempo no score solo par mi! El vanta ancora ben per le sò primavere, questo xè inegabile, anca se el scuminsia a "andar in piassetta" e qualche filo grigio xè comparso ne i ultimi 10 ani. Ma el xè na volpe argentata (proprio na volpe hehehehe ).....

Insoma el giorno fatidico xè andà cussì: Gavevo sconto el regalo ben ligà col nastro azuro dentro l'armadieto dei zoghi del gato ( là el Nane no mete mai man par paura de trovar el cadavere de un sorze portà dal Marco ) e stavo studiando el menù par la sena che organizavo co' i sò migliori amissi. Gavevo anca in mente de 'ndàr dal Parucchiere a metàr a posto la criniera e far una corsa al negossio de la Siora Chantal ( vero nome Marina, ma Chantal fa più foresto e "in" )..... Curo el pesse che lasso ben coverto a ciò che el gato no meta el baffo..... verdura lavada e preparada a dover, vin in ghiacciaia, stussichini pronti.... scampo! paruchier e in un'ora son pronta! Coro da Chantal e trovo un tubin nero senza spaline che me fa girar la testa, sperando de farghela girar anca al Nane ..... Sandali? Li gò zà...... e viaaaaaa..... Rivo a casa e preparo la tavola, fasso na docia veloce, giusto i cavèì, me vesto (beh però! miga mal la tosa!) .....sandali, profumo e scendo in sala dove..... no ghè nissun! O Santa Lucia ma dove se galo ficà stò omo? e i altri?..... Manca 10 minuti a le oto e ancora no ghe xè nissun!

Sona el campanèl e coro a verzàr: xè el garzon de la Pasticceria Rosa Salva che me mete in man el carton co la torta semifredo al cafè..... barcollo sin a la cusina e fasso par metàr la torta sul tavolo quando el gato entra da la porta come un mato, el me se intrufola tra le gambe e....... Spatasciafff...... Fasso el volo de madama canarina co' la testa in saloto e la mona in cusina  La torta oviamente xè sfassada, el gato se leca i bafi e mi son co' tre bignè a mò de corona in testa che no so se pianzer o ridàr..... ( el garzòn toco de mona sta ridendo come un mato e ghe ficarìa tanto volentiera el manigo de la scòa dove so mi .....

Intanto da la porta (sfiga vol che quando le scuminsia no le vien mai da sole) fa capolìn la Mama del Nane: Gavè presente un sergente magior tettesco co i bafi e la sotana? Eco! La xè vegnùa parchè la se deve sincerar che el Nane gabia ricevùo el sò regalo: l'enesimo pigiama a righe stile Alcatraz che tute le volte che el Nane se lo mete a mi me se spegne la vogia de far l'amor  Cussì va a finir o che lo mando in bianco, o lo spogio in freta e furia prima che me passa l'ardor .....Figureve i comenti! "Ma cara la mè dona cosa te fa in tera consada che te me par na terina de ovi?"...... ( Ma tute a mi le me deve capitàr? )..... Come Dio vol la mando fora da la porta, scampo in bagno e rivo a cavar da la testa i bignè (mmmm boni però) e salvar la piega.

I sòna a la portaaaa..... "Rivooooo"...... rivo talmente svelta parchè no me son inacorta che su la scala gera cascà un bignè da no so dove e sbrisso come na anguila fora dal sesto, capottandome dritta sui pìe de un Nane un poco imbronsà..... Cossa xè nato? Incespicando su mezo taco roto del sandalo destro lo brasso e ghe mormoro "Auguri amor mio", morsegando dolsemente el lobo del recio. El Nane se scanta come da un sogno, el me brassa e el fa par proseguir sul camin intrapreso da la sotoscrita quando che riva la "compagnia del Squero" e mi son frita! Tuti òmeni, misericordia ! E le signore? dove xele le muger? Le morose?..... Un bacan del diavolo, sembra el mercà del pesse el sabato matina! Cossa cavolo xè sucesso?..... Finalmente riva anche le signore: semo in 20 e non so nemeno come fassa la nostra casa a tegnir un tal simposio (mama come scrivo ben hehehehe ).....

Par farla breve: El Nane gà vinto el Concorso per el più bel gondolièr de Venessia. I ghe proprone un calendario (misericordiae populi nostri!), la partecipassion a tre trasmission su Canale Serenissima ( emittente locale) e in più anca un viazo a le Seiascelle par dò persone. E adeso chi lo tièn più? Poareta mi!.....

A stò punto penso che el motivo principal de la serata (el sò compleano) passi in secondo pian e infati le signore e i sò compari se mete a discutar de tuto l'acaduto mentre la sotoscrita se rifugia in cusina tra pentole, fornei, olio e calura par sfamar tute stè boche! La mia piega se ga meza disfata, el tubin xè macià de crema e alkermes, un sandalo xè partìo e me vien de pianzer, ma l'orgoglio austrungarico me tièn su e co el mio più bel soriso ebete servo in tavola. Sorido come na sardina frita a ogni batuta, rido come un branzin scampà al frito ma no a la graticola, insoma riva mezanote col brindisi e quel che resta de la torta sistemada in copete e l'apertura dei regali..... A l'una tuti fora da la porta! ( gato compreso visto che el gà un afar co na gata nel campielo più avanti)..... Lasso che el Nane fassa i ultimi saluti de pramatica e me strassino come na vecia rede da ratopàr su par le scale. Come Dio vol rivo a butarme sul leto vestìa, ma un ultimo susulto de orgoglio me spinse soto la docia. Me svesto, fasso scorer l'acqua e me buto soto al geto, cercando de desmentegàr la fadiga e sognando le coltri legere del leto matrimoniàl...... Ad un certo punto sento na spugna scorer lungo la schena.....Xè el Nane..... me giro e el me tira su i cavèi che me casca sul viso..... el me brassa e fissandome ne i oci quasi paralizzandome el me basa apasionatamente tanto che squasi me sento mancar..... Da là a rivàr al resto no ghe vol molta fantasia eh? So solo che me xè scopiada na vogia de far l'amor come poche altre volte prima. A quanto par vedarme cussì indafarada e fora ordine lo gà ecità più del solito hehehehe.....

Insoma el regalo squasi squasi me lo ga fato lu quel giorno, anzi..... quela note!..... Cossa ghe gera nel pacheto che ghe gavevo prepara? dirè vu...... beh, un semplice album de fotografie de quando gerimo morosi fin ai primi ani de matrimonio, fatte restaurar..... e na machina digitale par le prosime foto dei momenti che ancora gavaremo vogia de passar insieme.

P.S. El gato Marco xè rientrà a le sete de matina, quando che el Nane xè sceso in cusina a prepararme el cafè..... anca lù - secondo el Nane - gaveva na espression sodisfata stampada soto ai baffi.

Siorìe Lustrissime

Adonca, vegnimo a dir el merito.....Gavarìa da ilustrarVe qualche "perla" de sagessa venessiana che i "Veci" ne ga lassà in eredità....

A chi nasse scarognà che piove sul culo anca a star sentà (A chi nasce sfortunato piove sul culo anche stando seduto)

A dìr la verità ghe vol un cojon,  a dìr busìe ghe vol un bricòn ( Per dire la verità ci vuole un coglione, per dire bugie ci vuole un briccone )

A sentarse su dò careghe el culo se sbrega ( Se ti siedi su due seggiole, il tuo culo si strapperà )

A tirarse massa indrìo se finisse col culo in rìo ( Se ti tiri troppo indietro finirai col cadere in canale )( mè nevoda Roseta ghe ne sa qualcossa visto che l'suo ultimo cortegiator a Venessia xè finìo in Canal hehehehe )

Al ciaro de luse ogni stronso traluse ( Al chiaro di luce ogni stronzo traluce)

Amar e no essere amà xè come netarse el culo sensa 'ver cagà ( Amare e non essere corrisposto equivale a pulirsi il culo senza aver defecato)

Anca i cojoni magna pan (Anche i coglioni mangiano pane)

Bruta de muso, larga de buso ( Brutta d'aspetto, larga di buco )

Cavalo vecio e servo cojon no i imbrogia el paròn (Cavallo vecchio e servo coglione non possono imbrogliare il padrone)

Chi massa se inchina mostra el culo ( Chi troppo s'inchina mostra/dà il culo)

Chi che pissa controvento se bagna la camisa ( Chi piscia contro vento si bagna la camicia )

Chi che se marida e no sa l'uso, fa le gambe fiape e longo el muso ( Chi si marita e non conosce l'"uso", fa le gambe stanche/deboli ed il muso lungo )

Chi dopera el letame no ga mai fame (Chi adopera il letame non avrà mai fame)

Chi vol far el stronso massa grosso ghe vien le lagrime ai oci ( Chi vuol fare lo stronzo troppo grosso avrà le lacrime agli occhi )

Co' capita un bocòn soprafin, mona chi no ghe ne aprofita (Quando capita un buon boccone, è stupido chi non ne approfitta )

Co' el lupo deventa vecio i cani ghe pissa ne le coste ( Quando il lupo diventa vecchio i cani gli pisciano tra le costole )

Co' i birbanti el galantomo fa sempre la figura del cojon (Con i birbanti il gentiluomo fa sempre la figura del coglione )

De Siori ghe n'è tre sorte: Siorsì, Siornò e Sior mona (Di signori ce ne son tre tipi: Signorsì, Signornò e Signor Stupido)

Dopo i ...anta gambe che tremola e tete che piove (Dopo gli "anta gambe che tremano e seni che cadono )

El diavolo va sempre a cagàr sul monte più alto (Il diavolo va a cagare sempre dove il monte è più alto )

El naso dei gati, i zenoci dei omeni e el culo de le done xè sempre fredi (Il naso dei gatti, le ginocchia degli uomini ed il sedere delle donne sono sempre freddi)

El tempo, el culo e i siori fa sempre quel che vol lori ( Il tempo, il culo ed i signori fanno sempre quello che vogliono loro )

I cojoni del can e i schèì del vilàn xè i primi a mostrarse ( I coglioni del cane ed i denari del villano sono i primi a mostrarsi )

I mona i se vede da dò cosse: Dal parlar quando che i dovarìa tasèr e dal tasèr quando che i dovarìa parlar ( Gli imbecilli si riconoscono da due cose: dal parlare quando dovrebbero tacere e dal tacere quando dovrebbero parlare )

In estate le vache le và in montagna a far le siore,e le siore va in montagna a far le vache ( In estate le vacche vanno in montagna a far le signore e le signore vanno in montagna a far le vacche ) ( Cortina d'Ampezzo )

La passiensa xè la minestra dei bechi e la speranza xè l'altr dei cojoni ( La pazienza è la minestra dei becchi/cornuti e la speranza è l'altare dei coglioni )

Le femene no le sa de essar sentade sora la propria fortuna (Le donne non sanno di essere sedute sopra la propria fortuna )

La mugièr xè come na scoresa: o te la moli, o te la sofeghi ( La moglie è come la scorreggia: O la molli o la soffochi ) ( idem per il marito )

Le tose lo desidera, le maridàe lo prova e le vedove lo ricorda ( Le ragazze lo desiderano, le mogli lo provano e le vedove lo ricordano )

Megio 'ver dò schei de mona in scarsela che passar par massa svegio ( Meglio avere due soldi da stupido in tasca che passare per troppo sveglio....alias, meglio non passare per troppo sveglio e qualche volta far la figura di chi non sa)

Megio aver le braghe subse sul culo che aver el culo sbuso soto le braghe (Meglio avere i calzoni col buco sul culo che avere il culo bucato sotto i calzoni )

Megio na torta in dò che na merda da solo ( meglio una torta in due che una merda da solo )

Ogni dona la xè casta se no la gà chi la cassa (Ogni donna è casta se non ha chi la.....ahem.....)

Par voler saver de tuto se sa anca da mona ( Per voler sapere di tutto si finisce col sembrare un imbecille )

Più in alto se va e più se mostra el culo ( Più in alto si sale e più si mostra il culo)

Piutosto che le tarme la magna, megio xè che i osèi la bècola (Piuttosto che le tarme la mangino è meglio che gli uccelli la becchino )

Se tuti i bèchi portasse un lampiòn, che gran luminassiòn! ( Se tutti i cornuti portassero un lampione, sai che grande illuminazione? )

Signor fa che no sia bèco, se lo son, fa che no lo sapia e se lo so, fa che no ghe bada ( Signore fai che non sia cornuto, se lo sono fa che non lo sappia, e se lo so fa che non ci badi )

Tira de più un pel de mona che un caro de bò (Tira più un pelo del monte di Venere che un paio di buoi )

Tre volte bòn fa mona ( Tre volte fai il buono e sembrerai un imbecille )

Tuti ga la sò ora de mona ( Tutti prima o poi avranno la propria ora da imbecille.....ma si può anche tradurre: Tutti avranno la propria ora con una donna compiacente)

Tuti quanti (omeni) semo mati par quel buso da dove semo nati ( Tutti quanti - uomini - siamo matti per quel buco da cui siamo nati )

Vardate dal culo del mulo, dal dente del can e da chi che tien la corona in man (Guardati dal posteriore del mulo, dal dente del cane e da chi tiene la corona in mano - qui diversa l'interpretazione: corona in man = potere, ma anche corona sta per rosario, quindi il clero )

Xè megio esssar bechi e aver da becare che non esserlo e no 'ver da magnàr (Meglio essere cornuti e avere da mangiare che non esserlo e patire la fame)

Largo come i corni in ponta ( Largo come le corna in punta = avaro )

Siorìe Lustrissime

El nostro Gato se ciama Marco, in onòr del Santo Patron de la Serenissima.....deto anca el "Casanova del Sestrièr de Castèo"  ..... Par che 'l gàbia meso insinte più gate lù che 'l famoso Porfirio Rubirosa gàbia fato conquiste! hihihi.....

Tute le comari de le Calli intorno a quèa dove 'bitemo mì e 'l Nane tièn de ocio le proprie gate e xè zà suceso altre volte in 15 ani che se gavemo trovà un sesto davanti al portonsìn de casa pien de gatini da lògar. Par fortuna sinora semo rivàì a sistemarli tuti grassie ai coleghi del Nane e a i mè studenti. Par fortuna che a Venessia i gati xè sacri  altrimenti el nostro "Casanova" a stà ora ne starìa vardando dal Paradiso dei Gati.....

"Casanova"/Marco xè un gato sorìàn, particolare nel sò insieme, un connubio de virilità gatesca e de astussia felina....no sò dirve se a volte el ghe somiglia più a un gato o a 'na volpe.....Pelo medio e folto, manto grigio color fuligine de camìn, strìà più ciaro de quando in quando, recie due, la sinistra col ricordo de na baruffa, portata su le ventitrè come na medaja al valor, bafi alteri, sguardo 'sassìn ( a volte el me imbarondola persin quando che curo el pesse che me porta el Nane da Torcello e 'l me ruba un sardonsìn de soto i oci hehehehe )

L'altro giorno xè suceso un mezo pandemonio..... Sarà stà primo pomerigio, giornata de sol e calda per sto' inissio de magio: gavemo visto arivàr de corsa el gato, co la còa alta e co 'l espression sodisfata de un che gà pena tocià el biscoto nel vin Santo..... Urli e strepiti de lontàn: "Se te ciapo te sistemo miiii"..... "Bruto porco d'un gatoooo...." ..... e ancora: "La nostra gatina vergine imacolata el gà dissacrà, quel porco d'un gato!!!"..... Tra sventolìo de sotane e scuffia che squasi ghe se rebalta da la testa vedemo arivàr de gran cariera la Madre Superiora del vissìn convento seguìa dal sagrestàn de la Ciesa de i Greci..... Insoma "Casanova gaveva colpìo ancora  Gavemo sudà sete camise e mesa par far calmar la Sorella Berenice del Santo Sepolcro che voleva portarse vìa el gato e darghelo in pasto ai gransi de la Laguna! Manco i ghe gavesse mancà de rispeto a Ela de persona! ..... Fortuna gà vossùo che "Casanova" sia rivà a sconderse in mezo a un mucio de reti da pesca butaè là in un angoèto e che el Nane, col sò far da zentilomo de vecio stampo ( ma furbo come el nostro gato ) el sìa arivà a calmarla e a prometerghe de logarghe tuti i gatini qualora la "povera gattina rimasta vittima di un sì prepotente maschio" la fosse rimasta gravida.....

Insoma tra el paròn de casa e el gato gò el mio bel dafar hehehehehe.....

Siorìe Lustrissime  Parona!

( ahem.... sto cercando sul web un dizionario di "venessiano"..... )