ChioggiaTv

Semo rivai a feragosto: i veci xioghe a bocie, le ostarie xè piene, ghe xè i foresti, ghe xè xà le suche, pasta e fasioi, risi e bixi, panocie, le cosséte, limonada, mistrà e chi pì ghe nà pi ghene meta! Mercore de sicuro in spiagia ghe sarà tavolate de caparossoli in cassopipa e peoci! Immancabili gavetoni, schiuma da barba e sabion, la tombola. Ghè sarà el solito tipo che ronchexe e bute rabioso che ad un certo punto quando l'amaro ghe bruxarà el stomego a se svegiarà e a sigarà : E AORA CIO' !!!! E aora ciò digo mi come ve seu drio a organixare per sto feragosto che xè deboto pì celebre del Nadale?  El segno pì fotunà xè el sagitario!

ARIETE

Altro che na note da leoni! ecco perchè ni à fato i fuoghi...li fè vù! altro che omo torcia!

ATENTI,IN CASO VIAGÈ CO L' ESTINTORE!

TORO

I tori sto giro a vogia de un fià de silensio e riposo,dopotuto no le xè ferie per stò motivo?

VE CONSIGLIO ACQUA E SOLE A TUTE LE ORE!

XEMEI

Manco polemiche pì sorisi! sì sè splendidi,ma no ve ruote tuto intorno,verxè el cuore!

ORGANIXEVE PER UN BEL PARTI

CANCARO

Vogia de fare saltame adosso! ma la xè andà in ferie anka ela,quindi stè queti e ronchexè!

GHE XÉ TUTO UN ANO PER CORARE!

LEON

Cocoloni: sta setimana sè leoni mascarai da passeroti.Calibrè pensieri e parole.

DIVERTIVE SENSA PENSARE A COSSA E COME

VERGINE

No dubitè dele vostre capacità e no pexè le menae che spare la xente che spesso xe mossa da cativeria e ignoransa. FREGHEVENE E PROTEGEVE CO UN BEL SVAGO

BILANSA

Avè raxòn,agosto balordo co dò lune piene,mande in confusiòn tuti.Ma no feghene na malatia.

RIDEGHE DE SORA E DE SOTO!

SCORPION

Come ala rulete capite chel dì che se ciape. Ocio che l amore vero xè che ve ronxe drio.

ATENTI ALA RUOTA!

SAGITARIO

Pachia,tranquilità positività.Setimana perfeta: amore e divertimento al top.

FERAGOSTO D.O.C

CAPRICORNO

Un pò de fastidi riservai dal tempo,ocio a cervicale e giunture.Ma no rabieve dai,baste un masagio o un antifiamatorio.

UN BEL BRINDISI IN COMPAGNIA E LA VE PASSE!

ACQUARIO

Acquario vacansiero ti tà xà messo el sombrero. Vedo passiòn e divertimento sfrenà.

SEMPRE IN GUARDIA PERÒ!

PESSI

Tanta dedisiòn e disponibilità,chissà che la ve venia riconossua e ricambià. Avè un grande cuore.

DESIDERIO DE SOLE E XERO PENSIERI

che dite...si fa l'alba  a Ferragosto?

                                                                AUGURI EMY!!!

                                                                Elisabetta Donaggio