Friendship

LA PEDDI NOVA  di Ignazio Buttitta(in ricordo delle ultime vittime sul lavoro in Sicilia)

Certu era bellu scriviri    comu un briacu   a la taverna a biviri,   chi guarda la buttigghia   e ci parra,   e ridi a lu bicchieri   chi svacanta   e torna a ghinchiri arreri.  

Scriviri mprinatu d'amuri:   la gravidanza, li dogghi, lu partu,   lu tempu esattu   pi fari un figghiu   e nasciri na puisia.

Certu era bellu;   ma ora sugnu spirtusatu,    lazzariato di dintra,   e scrivu   cu lu duluri chi mi torci   comu un sarmentu a lu furnu;   com'unu assicutatu di li spirdi   e muzzicatu di lapi.

La storia di st'anni fucusi   ha zappatu cu l'ugna   dintra di mia,   e restu scantatu a taliari   l'omini tutti   mpinnuliati a un filu,   a un distinu sulu,   dintra na varca di pagghia c'affunna.

Sentu ca la me vuci   chi li chiama di luntanu   avi limmiti e cunfini d'amuri   e mòri nni l'aria.

Voggh'essiri un cocciu di rina   nni la rina di la praja;   un pisci nni la riti cu l'àutri   mpignati a sfunnari   la gaggia chi li chiuj.

Mi vogghiu svacantari, scurciari,   farimi la peddi nova   comu li scursuna.

******************************************************************************