PRESICCESI NEL MONDO

Una poesia in dialetto presiccese di VITO STENDARDO

Sfogliando un mio vecchio libro, vi ho trovato un foglio contenente una poesia di Vito Stendardo. Nel rileggerla ho riscoperto tutta la bellezza e la bravura letteraria che contiene e che non mi erano sfuggite al momento che il foglio era caduto nelle mie mani, ragion per cui l'avevo conservato. Così adesso, profittando del Blog la voglio proporre qui ai nostri compaesani. Per il momento ne pubblico solo un brano, mancandomi il tempo di pubblicarla per intero, essendo piuttosto lunga. A presto.

LUIGI CASCIARO

SANT’ANDREA E LU VECCHIAREGGDU

                          Di Vito Stendardo

O Sant’Andrea ci stai sulla culonna

ca tuttu scopri e vidi de dgda susu,

si’ comu ceggdu alla chiù erta fronna

de lu sciardinu meu, quannu era carusu.

Nasce lu sule all’alba quannu è chiara,

lu vidi tie pe’ primu sempre ssire,

quant’arbe sutta all’occhi toi passara

e giurni ca l’hai visti poi scurire!

Ci sape a quale seculu passatu

a menzu a tanti santi te scucchiara

li vecchi nosci e t’hannu poi piazzatu

a susu a sta culonna tantu cara...

Cusì intra nu paese piccinneggdu

Spiccavi susu a tutte le cuntrade

sulu de susu a tie nc’era casteggdu,

lu campanaru de la chiesia madre.

De gdai vidivi quantu succidia

e te rravava puru ogni vuce

scuprivi ogni angulu ogni via,

la gente quannu mara quannu duce.

A susu a chiru libbru ca te’ mbrazze,

e te lu strinci mpettu culle trie

t’è scrittu numi, nciurite e le razze,

li nasciruri e tutte le famie.

N’hai visti tanti de gdi povareggdi

tra l’arburu de pipe e la culonna

spettare comu tanti cagnuleggdi

priannu Diu, li Santi, la Madonna.

E lu patrunu ca de gdai passava

Lisciannuse la barba o lu mustazzu,

de capu ampedi tutti li squatrava

e mposimatu comu nu pupazzu

se li carbava o ci te canuscia:

“tie va’ alle Panze... tie va’ alli Canali...

tie invece vane zappa alla Calia...

tie rrunca a Ptrusceggde... e tie alli Pali”.

E dopu ch’ia spicciatu se vutava

vardannu compiaciutu ca vidia

la coppula ca ognunu se llavava

dicennu poi: “salute a signuria”.

E quannu ormai lu sule era nchianatu

e la speranza ognunu poi pardia,

scurnusu riturnava e nnudacatu

a casa sua lu sire de famia.

E no sapia pe quale malasorte

no cchiava na sciurnata de fatia

e se priava sulu sulu a morte

de nanzi a tutti chiri d’a famia.

Cci fame nc’era tannu a ntru paese,

la gente pe le vie se trascinava

tantu l’artieri quantu lu furese

paria te’ ca te’ ca mo scuppava.

Cci tiempi, Sant’Andrea, mancu li cani,

né allu pesciu ca tegnu pe’ nemicu!

Vardene tutti e tegnili luntani

ciuveggdi cu eggia nfertu né mannicu.

Te li ricordi l’anni de la guerra...

Partira i Presiccesi a ogni cuntornu;

acquai lassara fii, parenti e terra

e tanti chiui no ficere ritornu.

Rravara l’anni de l’emicrazioni:

pe’ primu era u sire ca partia,

la mamma poi cu tutti li vagnoni

puru iggda a chiri ienti se ne scia.

Te lu ricordi,poi, chiru dalluiu

ca ne nfucò allu cinquatasette...

de gdai te lu vidisti lu ntravuiu,

iue persi la sciumenta e do’ crapette;

comu nu filmi me li visciu nnanti

tutti gdi fatti e tuttu gdu patire,

ma ringraziamu Tie e li meiu Santi

se nuggdu presiccese ippe murire.